Одоогоос найман жилийн өмнө буюу 2015 оны 12-р сарын 23-нд гар утасны хулгайн хэрэгт холбогдсон 16 настай Ц.Г гэх хүүг Өвөрхангай аймгийн цагдаагийн газрын алба хаагч, дэслэгч /тухайн үед дэслэгч цолтой байсан/ Б.Бямбасүрэн гэгч Өвөрхангай аймгийн цагдаагийн газарт зодож хөнөөсөн байж болзошгүй байдал тогтоогдсон байна.
Улмаар эрүүгийн хэрэг нээж, шалгасаар өнөөдрийг хүртэл шүүхээр эцэслэн шийдэгдээгүй юм. Учир нь уг хэрэг гарах үед хүүхэд зодож хөнөөсөн байж болзошгүй цагдаагийн алба хаагчийн аав Б.Батбаяр нь Өвөрхангай аймгийн шүүх шинжилгээний албанд ажиллаж байсан.
Улмаар хүүхэд нь хүн хөнөөхөд аав нь талийгаачид задлан шинжилгээ хийсэн шинжээч эмчийн дарга нь байсан болохоор хэргийг булиантуулсан байж болзошгүй байна.
Найман жилийн өмнө гарсан хэрэг өдгөө Чингэлтэй дүүргийн эрүүгийн хэргийн анхан шатны шүүхэд хянагдаж байгаа юм. Урьдчилсан хэлэлцүүлэг болж, гэм буруугийн буюу ял оноох шүүх хурал нь болоогүй л байна.
Хүүхэд зодож, хөнөөсөн байж болзошгүй энэ хэрэгт яллагдагчаар татагдсан цагдаагийн алба хаагч, ахмад Б.Бямбасүрэнгийн хувьд өмнө нь хүчингийн гэмт хэрэгт холбогдож байсан түүхтэй.
Мөн Б.Бямбасүрэн нь хүн амины хэрэг нь шийдэгдээгүй байхад буюу цагдаагийн албанд ажиллаж байхдаа хахуулийн хэрэгт холбогдсон бөгөөд хахуулийн хэрэг нь хүн амины хэрэгтэй нь хамт дэнслэгдэхээр шүүхийн шатанд удаашраад байгаа юм.
Түүнд эрүүгийн хуулийн
10.1-1 Хүнийг алах – Хүнийг алсан бол найман жилээс арван таван жил хүртэл хугацаагаар хорих ял шийтгэнэ.
22.1-1 Эрх мэдэл, албан тушаалын байдлаа урвуулан ашиглах – Нийтийн албан тушаалтан албан үүрэг, бүрэн эрх, албан тушаалын байдлаа урвуулан ашиглаж, эсхүл зориуд хэрэгжүүлэхгүй байж өөртөө, эсхүл бусдад давуу байдал бий болгосон бол нийтийн албанд ажиллах эрхийг хоёр жилээс таван жил хүртэл хугацаагаар хасаж нэг жилээс таван жил хүртэл хугацаагаар зорчих эрхийг хязгаарлах, эсхүл нэг жилээс таван жил хүртэл хугацаагаар хорих ял шийтгэнэ.
22.4-4 Нийтийн албан тушаалтан хахууль авах зүйл ангиар яллах дүгнэлт үйлдээд байгаа юм.
Хүн амь, хүчин, хахуулийн хэрэгт холбогдсон цагдаагийн алба хаагч талийгаачийн оршуулгын зардлыг өгөөгүй бөгөөд саяхныг хүртэл цагдаагийн албанд ажиллаж байсан гэх мэдээлэл байна.
Чингэлтэй дүүргийн эрүүгийн хэргийн анхан шатны шүүхээс цагдаагийн албанд ажиллаж байсан Б.Бямбасүрэнд холбогдох хэргийг хэрхэн шийдсэн талаар бид эргэж мэдээлэх болно.
А.Баярмаа
