Жүжигчин Г.Ундармаа цахимд нийтлэгдсэн мэдээнийхээ талаар тайлбар бичжээ.
Тэрээр “Цахим мэдээллийн хэрэгслээр цацагдаж байгаа мэдээлэлтэй холбогдуулан үгээ хэлэх нь зүйтэй гэж бодлоо.
Сүүлийн жилүүдэд кино уран бүтээлчид биднийг дэмжих хууль батлагдаж уран бүтээлчдийг чавахижуулах үйл ажиллагаанууд зохион байгуулагдаад явж байгааг бүгдээрээ мэднэ. Энэ хүрээнд Кино урлагийг дэмжих сангаас салбартаа ихийг хийж бүтээх хүсэлтэй залууст тэтгэлэг, зээл зэргийг өндөр шалгууртайгаар олгож байгаа. Богино, бүрэн хэмжээний, баримтат, анимэйшн гэх зэрэг бүхий л жанр төрлийн бүтээлийг гаргахад маш олон хүний хөдөлмөр оролцдог. Тэр хэмжээгээр санхүүжилт нэн тэргүүний асуудал болдог. Үүнд нь дээрх сангийн /бусад сангуудын хажууд жижигхэн/ хөрөнгийг ёстой л эхийг нь эцээхгүй тугалыг нь тураахгүй хувааж өгч байгааг хөндлөнгөөс хараад л явж байна.
Миний хувьд манай улсад хүүхдийн, тэр дундаа анимейшн төрлийн бүтээл олон төрж гараасай гэж хүсдэг. Тэр хүслээ биелүүлж олон хүүхэд залууст эерэг нөлөө үзүүлэх бүтээл гаргахаар оролдож сүүлийн хэдэн жил судалж ажилласаар байсан. Уран сайхны киног бодоход өндөр зардлаар, урт хугацаанд бүтдэг учраас хөрөнгө оруулалт тун чухал. Үүнд маань сангаас санхүүжилт олгосонд баяртай байгаа. Мэдээж хийх бүтээлийн маань бүрэн зардал биш. Санхүүжилт олгохоос өмнө манай компани өөрсдөөсөө бүхий л зардлаа гаргаад явж байгаа . Хэдийгээр тушаал нь 2023.05.01-нд гарсан боловч санхүүжилт өчигдөр л орж ирсэн. Төсөл эхлээд л явж байгаа. Зохих татваруудаа төлсөн. Тэгэхээр та бүхэн минь хэт туйлшралгүй хүлээцтэй хандахыг хүсье.
Бас нэгэн зүйл нэмж хэлэхэд сүүлийн үед Засгийн газраас авч хэрэгжүүлж байгаа 5Ш үйл ажиллагааны хүрээнд олон сангийн хууль бус, муухай бүхэн ил гарж байгаад баяртай байгаа. Тэр хэрээр би ч гэсэн та нартай ижил үнэхээр уур хүрж бухимдаж байна. Тэд зохих хариуцлагаа үүрэх, өрөө төлөх ёстой. Гэхдээ уран бүтээлчдээ дээрх асуудлуудтай хольж туйлшралгүй урам зориг өгөөрэй. Саяхныг хүртэл бор зүрхээрээ явсан зэвсэг нэгт ахан дүүсэд минь бага ч болов төрийн дэмжлэг ирж чанартай уран бүтээл төрөх цаашлаад олон улсын хэмжээнд бүтээл туурвихад түлхэц болж байгаа юм шүү. Энгийн нэг жишээ гэхэд л Каннын кино наадамд оролцож буй Баавгай болохсон киног хийхийн тулд найруулагч нь хичнээн их хичээж олон жил зүтгэсний хүчинд ийм ажмилт үзүүлж байгаа гэж бодож байна? Энэ мэт чадварлаг залууст эхлэх хөрөнгө маш чухал. Тийм учраас ядахдаа Кино урлагийг дэмжих санг нягталж сайн судлаагүй мэдээллээр битгий гацаагаасай гэж хүсэж байна” гэлээ. Мөн ажлынхаа зургийг хавсгарсан байна.
