3х3 сагсанбөмбөгийн холбоо МУГД С.Тулгыг өөрт нь мэдэгдэлгүйгээр ажлаас чөлөөлжээ.
3х3 сагсанбөмбөгийн шигшээ баг ДАШТ-д оролцохоор Австрид очоод буй билээ. Тэгвэл МУГД С.Тулга саяхан сошиал хуудастаа дараах мэдээллийг оруулсан байна.
Тэрбээр “Би гэдэг хүн их азгүй хувь тавилангүй хүн юмаа.
Би энэ MGL3x3 холбоог хэл ам дагуулан бүх сэтгэл зүрхээ гаргана байж байгуулсан юм.
FIBA 2023 оны ази тивийн аварга болоод нийт Монголчууд маш их баярлахыг хараад залуустайгаа болон MGL3x3 хамт олон өөрсдөөрөө бахархаж билээ.
Тэрнээс хойш баг тамирчидтайгаа бэлтгэл ч хийж чадахгүй өдийг хүртэл тэвчээртэй хэл зажлаад, хор хов олон зүйлийг тэсвэр тэвчээр гаргаж залгиад өдийг хүрсэн юм.
Одоо тэгээд ази тивийн аварга болоод МУ-н ерөнхийлөгчийн зарлиг гаргахаар амжилт үзүүлээд, дэлхийн аваргаас олон жил ярьсан медалиа хамтдаа авах цаг нь ирлээ гээд залуустайгаа ярьж зүтгэж байсан юм.
Тэгсэн чинь залуусыг болон намайг аварга болсны шагнал MGL3x3 дасгалжуулагчаас хөөгөөд болиулсныг одоо л мэдлээ.
Монголоос явахад болиулсан хассан хөөсөн зайлуулсан гэдгээ хэлчихсэн бол юу гэж тэнэг хүн шиг энд ирэх билээ дээ. Дэлхийн аваргад амжилттай тоглохыг Монголын ард түмэн хүсэж байгаа боловч хэдэн тооны хүмүүс хүсээгүй юм байна гэж ойлгоод л сууж байна даа.
Энэ сагсан бөмбөгийг 2004-2023 он хүртэл 19 жил ёстой хоёргүй сэтгэлээр хоногийн 24 цаг багаддаг хөдөлмөрлөж Монголын номер 1 спорт болгох гэж олон залуустайгаа зүтгэсэн байх юм. Одоо тэгээд мөнгөтэй баян хүмүүсийг өмөөрөөд бөөн л сонгуульт компанит ажил өрнөх байх даа. Ёстой л тавилан юм даа.
Би үндэсний шигшээ багийн дасгалжуулагч биш жуулчин болсон шүү.
Монгол орныг тамын тогооны амьдралтай гэж баярлаад үсрээд гарна даа гэж бодож билээ. Тэгсэн чинь Монгол орон чинь хөмөрсөн тогооны амьдралтай юм байна.
Болж байгаа бодит зүйлсийг бичсэн юм шүү. МУ-н спортын хамгийн залуу гавьяат дасгалжуулагч С. Тулга” гэжээ.
