Хотын дарга маань хэлж байснаараа давс мэт шорвог шийдвэр гаргаж өчигдөр /2023-12-17/ танилцуулав. Харин уг шийдвэр шорвог гэхээсээ илүү амьдралгүй, мэдрэмжгүй, олны бухимдлыг төрүүлсэн шийдвэр байсан бөгөөд үүнийг дараах үндэслэлүүдээр тайлбарлаж болно.
Өнөөдөр л гэхэд иргэд 20-30 минут хүлээж автобусанд суусан. Мэдээж иргэд багтаагүй тул зарим нь үлдээд дараагийн автобус хүлээсэн бөгөөд хоорондоо маргалдаж байгаа харагдана лээ. Имй үед хүүхэд хөгшчүүд сууж чадахгүй гар хөлөө хөлдөөж, улам эрсдэлтэй байдал үүсэж байна.
Хэдийгээр энэ асуудлыг зохицуулахаар эхний ээлжний шинэ автобус нь 10 гаруй хоногийн дараа ирнэ гэх ч өнөөхийг нь ирэхээр үзлэгт оруулна, бичиг баримт гэсээр лав сар гаруй хугацаа болно. Тэгэхээр иргэд багагүй хугацаанд эрүүл мэндээрээ хохирох нь ээ…
Эдгээр үндэслэлээс гадна хотын дарга Х.Нямбаатар руу чиглэсэн шүүмж маш их байна.
•Хотыг хорьж удирдахгүй ээ Х.Нямбаатараа
•… чаддаг мэргэжлийн хүнд нь ажлаа өгөөд огцруул таарна!!! Чи хот удирдаж чадахгүй байна шүү
•Нийтийн тээвэр муутай байж дугаарын хязгаарлалт хийх газраа сунгамааргүй байнаа
•Энэ хотод автобус байхгүй! Такси байхгүй! Метро бүр ч байхгүй! Гадаа өдөртөө -30 хүрч байна! Дугаарын хязгаарлалттай өдрөө цэцэрлэгийн хүүхдээ хөтлөөд алхаад явах уу. Ядаж энэ хүйтэнд машин дотроо дулаан түгжирмээр байна
•Хоноцын шийдвэр гаргадгаа болиорой
•Х.Нямбаатараа нэг өдөр албаны унаагүй, жирийн иргэн шиг амьдраад үзээрэй.
•Х.Нямбаатарыг юм хийхгүй байна гэсэн хийхээрээ улам дордуулчихлаа гэх мэтээр түүнийг шүүмжилсэн шүүмж уртаас урт хөвөрнө.
Олон нийт өнөөдөр Х.Нямбаатарыг хорьж, цагдаж байгаа хэрнээ тэр нь хууль журмаасаа давсан арга хэмжээ авч байгаад бухимдалтай байгаа. Өөрөөр хэлбэл дугаарын хязгаарлалттай өдөр зорчсон тохиолдолд торгуулийн арга хэмжээ авдаг бол Х.Нямбаатарын гаргасан шийдвэр хэрэгжих хугацаанд эрх хасна гэж байгаа нь өөрөө хууль, журмаасаа давсан шийтгэл болж байгаа юм. Уг нь хууль зүйн сайд байсан хүн ийм алдаатай шийдвэр гаргаж байгааг иргэд эсэргүүцэн жагсахад бэлэн байна.
Иргэдийн бухимдал дээд цэгтээ хүрсэн тул ийнхүү жагсаал хийхэд бэлэн болжээ. Өнөөдөр шатахуунгүй, дотор муухай оргиулсан бохир агаартай, унаагүй, гулгаа үүсэн зам дээр эрүүл мэнд амь насаараа дэнчин тавин ажиллаж амьдарч байгаа нь бухимдлыг дээд цэгт хүргэж байна. Тиймдээ ч цахимд жагсаал хийх тухай яригдаж байна.
Уг нь Х.Нямбаатарыг жагсаал хийх үед өнөөдрийнхөөс хамаагүй дээр байв. Харин Х.Нямбаатар, Л.Оюун-Эрдэнэ нарын жагсаалын дараа, тэднийг эрх мэдэл албан тушаалд очсоны дараа байдал эрс муудлаа.
Энэ бүхнээс дүгнэхэд олон нийт Х.Нямбаатарыг “зайлах” нь зөв гэж үзэж байгаа бололтой. Уг нь гай болохоор зай бол гэж ардын сайхан үг бий. Х.Нямбаатар даргаа гай болохгүй зай болчихвол дээргүй юу?
