Орхон аймагт Илгээлтийн эздийн 50 жилийн ой, Хангайн бүсийн хурдан морьдын уралдаан, Орхон аймгийн баяр наадмын хурдан морины уралдаан өнөөдөр болж байгаа билээ. Уралдааны шүдлэн насны морины уралдаанд нийт 131 морьд бүртгүүлснээс гарааны зурхай руу 97 шүдлэн мордсон байна. Барианд хүүхэд унасан нэг шүдлэн орж ирсэн бөгөөд унаач хүүхдэд эмнэлгийн анхны тусламж үзүүлж асран хамгаалагч уяачд нь хүлээлгэн өгчээ.
Бидэнд ирсэн албан бус мэдээгээр тус уралдааны хязаалангийн уралдаан болох үеэр ус ихтэй бороо орж, зам харгуй муу, хүнд болсон байна. Үүний улмаас 90 гаруй үрээ хурдалснаас 50 гаруй унаач хүүхэд нь унасан гэх мэдээлэл байна.
Албан эх сурвалжаас тодруулахад 14 хүүхэд унасан гэх мэдээллийг өглөө.
Морин уралдаан болж байгаатай холбоотойгоор ХЭҮК Гэр бүл, хүүхэд залуучуудын газар, цагдаа, онцгой байдал, эмнэлгийн байгууллага тус тусын чиглэлд анхааран ажиллаж байгаа юм байна.
Албан эх сурвалжийн мэдэгдснээр мориноос унасан хүүхдүүдэд нэн даруй эмнэлгийн анхан шатны тусламж үзүүлэн ажилласан гэв. Тодруулбал, ХЭҮК-ийн Сэлэнгэ, Булган, Орхон аймаг дахь салбар, эмнэлгийн түргэн тусламжийн хоёр машин бүхий эмч нар , Орхон аймгийн ЗДТГ ажиллаж, мориноос унасан хүүхдүүдэд цаг алдалгүй эмчилгээ үйлчилгээ үзүүлэн, морь барианд асран хамгаалагч нарт нь хүлээлгэн өгсөн бол онцгой байдлын алба хаагчид, болзошгүй эрсдэл бүхнээс хамгаалж, цагдаа хамгаалалтын чиг үүрэг гүйцэтгэж байгаа аж.
