Агаарын бохирдол гамшгийн хэмжээнд хүрсэн энэ цаг үед Монголын эрдэмтэн, судлаачид хүнд болон байгаль орчинд сөрөг нөлөөгүй утаагүй түлш хийхээр олон жил ажилласаар ирсэн. Хөдөө аж ахуйн их сургуулийн багш, судлаачид 16 жилийн турш судалж аргалаас утаагүй биотүлш хийж, худалдаанд гаргахад бэлэн болсон байна.
Харин үйлдвэрлэхэд хөрөнгө санхүүжилт дээрээ гацаад байна.
Тодруулбал, Хөдөө аж ахуйн их сургуулийн Инженер технологийн сургуулийн багш нар перолизын процессоор аргалд агуулагдаж байгаа шатамхай хий болон бусад элементүүдийг нь шатаагаад биотүлш гаргаж авсан байна. Ингэснээр утаагүй, үнэргүй түлш бий болж байгаа бөгөөд илчлэгийн хэмжээ Багануурын нүүрснээс ялгаагүй болох нь туршилтуудаар нотлогджээ.
Нэг кг аргалаас 300 грамм бионүүрс гарч байгаа. Олон нийтийн хэрэгцээнд ашиглахад ямар хэлбэртэй нь тохиромжтой эсэхийг ХААИС-ийн багш, судлаачид тогтоосон.Улмаар таны харж байгаа цагираг хэлбэртэй түлш нь хэрэглээнд хамгийн тохиромжтойг тогтоожээ.
Уншигч таны харж байгаа энэхүү 15 грамм бүхий энэхүү нэг түлш 34-45 минутын турш асдаг. Манай сурвалжилах баг уг түлшийг асаасан өрөөнд 20 гаруй минут суухад ямар нэг утаа гараагүй юм.
Уг биотүлшийг хэрэглэхийн тулд заавал зуухаа солих шаардлагагүй. Ямар ч зууханд түлж болдгоороо энэхүү биотүлшний давуу тал юм. 
Хэрвээ санхүүжилт дэмжигдвэл хот гэлтгүй хөдөө орон нутагт үйлдвэр барих боломжтой аж. Ингэснээр малчид аргал, хөрзөнгөө үйлдвэрт тушааж тогтмол ашиг орлоготой болох, биотүлшийг хямд үнээр авах зэрэг олон давуу талтай болно.
Хөдөө аж ахуйн их сургуулийн Инженер технолoгийн сургуулийн багш, профессор Б.Мөнхбатын хэлж байгаагаар долоо хоногт 15-20 тонныг үйлдвэрлэх хүчин чадалтай үйлдвэрлэлийг Японы санхүүжилтээр эх нутагтаа нэвтрүүлэхээр ажиллаж байгаа аж. Ингэснээр агаарын бохирдлыг тодорхой хэмжээнд бууруулууах боломжтой болно гэдгийг тэрбээр онцолсон.
Монгол улс 60 гаруй сая толгой малтай. Эдгээрээс жилд 70 сая тонн бууц, аргал, хөрзөн гардаг нь биотүлшийг олон нийтийн хэрэглээнд нэвтрүүлэхэд түүхий эдийн хомсдол үүсэхгүй гэх судалгааг мөн гаргаад байна.
Бэлтгэсэн Я.Хулан
А.Баярмаа
