2024 оны УИХ-ын сонгуулийн I тойрогт АН-аас нэр дэвшин сонгогдсон УИХ-ын гишүүн, ӨВМТХ компанийг үүсгэн байгуулагч Г.Хосбаярыг бусдад хээл хахууль өгсөн гэх хэрэгт яллагдагчаар тооцоод буй аж. Гэвч УИХ-ын гишүүний халдашгүй байдал гэх халхавч дор орсон учраас мөрдөн шалгах, шүүхээр хэргийг шийдвэрлэх ажиллагаа гацчихаад байна.
Бидэнд олдсон мэдээллээр тэрбээр бусдад хахууль өгсөн нэг бус хэрэгт холбогдсон гэнэ.
Хамгийн сүүлд Сангийн яамны эрх бүхий албан тушаалтанд хахууль өгсөн байж болзошгүй хэмээн шалгах гэсэн ч халдашгүй байдал хэмээх халхавч нь саад учруулж байгаа бололтой.
Зүүн Азийн залуучуудын спортын наадмыг 2023 оны наймдугаар сард Улаанбаатар хотноо зохион байгуулахтай холбоотойгоор спорт цогцолбор барихаар болсон байдаг. Үүний хүрээнд 2020 оны тавдугаар сарын 19-нд Цэнгэлдэх хүрээлэн, спортын цогцолборын барилгын ажил гүйцэтгэх тендерт Г.Хосбаярын эзэмшлийн ӨВМТХ ХХК шалгарч гэрээ байгуулсан аж. Ингэхдээ тэрбээр компанидаа давуу байдал олж авахын тулд
“Улаанбаатар спорт менежмент” компанийн гүйцэтгэх захирал Б.Тамирт найз О.Анхбаярынх нь дансаар дамжуулж 194 сая гаруй төгрөгийн хахууль өгсөн хэрэгт холбогдсон талаар бид өмнө нь мэдээлж байсан билээ.
Манай хууль, эрх зүйн зохицуулалт тааруугаас прокурор, шүүхийн шатанд өмгөөлөгч нараараа дамжуулж олон гомдол, хүсэлт бичүүлдэг. Тэр бүхнийг нь хангах, нягтлах гэж хугацаа алдсаар байх хооронд авлигын хэргийн яллагдагч нар ял завших нь завшиж, халдашгүй байдал гэх халхавч дор орох нь орсоор шийдэгдэхгүй гацах тохиолдол байна. Үүний нэг жишээ нь УИХ-ын гишүүн Г.Хосбаярын албан тушаалтанд хахууль өгсөн гэх хэрэг болох нь.
