Хотын дарга Х.Нямбаатар олон нийтийн зэвүү дургүйг хүргэсэн олон шийдвэр гаргасаар байгаа билээ. Тиймээс цахим орчинд түүнийг нянбактер, төлгөн коммунист зэргээр шүүмжилсээр байгаа бөгөөд иргэдийн бухимдлаа Сүхбаатарын талбайд УИХ тар, ЗГ огцор уриатай жагсаж байгаа. Жагсаалын үеэр иргэд хотын дарга Х.Нямбаатарыг мөн шүүмжилж байгаа юм. Харин энэ цаг үед тэрбээр “ахисан түвшний хэрүүлч авир”-аа асар сайн нуун дарагдуулж ажлаа сайн хийж байгаа мэтээр харагдахыг илүүд үзэх болсон.
Тэр ч утгаараа өөрийнхөө цахим хуудсанд “Улаанбаатар Метро төсөл дээр Английн Засгийн газар баталгаа гаргахаар боллоо” гэсэн утгатай постыг тамгагүй албан бичгийн хамт байршуулжээ.
Англи хэлтэй зарим нэг хүн уг бичгийг үзээд өөрийнхөө англи хэлний ур чадварт эргэлзэхэд хүрлээ. Тодруулбал, уг бичгийн агуулгад нь яг баталгаа гаргаж өгнө өө гэж бичсэн зүйл байсангүй. Тодорхой болзол хангаж байвал баталгаа гаргах боломжтой бөгөө албан бичигт тусгагдсан асуудлаар ярилцахад бэлэн байна л гэсэн агуулгатай байв.
Хэрвээ баталгаа гаргаж байгаа бол ядаж энэ бичгэн дунд Guarantee гэдэг үг байх ёстой байв. Албан бичгийг “махчлан орчуулбал” ийм утга агуулга гарч байна.
Эрхэм хүндэт Хишгээ Нямбаатар Танд,
UK Export Finance (UKEF)-аас Улаанбаатар хотод газар доорх метроны систем байгуулах төслийн талаар Нийслэлийн Засаг даргын Тамгын газартай ярилцсаны үндсэн дээр танд энэхүү албан бичгийг илгээж байна.
Манай байгууллага Монгол Улсад хэрэгжүүлэх төслүүдэд дэмжлэг үзүүлэх өргөн боломжтой бөгөөд Улаанбаатар хотод метроны систем барих төслийг дэмжих, хамтран ажиллах бэлэн байдлаа илэрхийлэхийг хүсэж байна.
Их Британийн Засгийн газрын албан ёсны экспортын зээлийн агентлагийн хувьд UKEF нь өрсөлдөөнт, урт хугацааны санхүүжилтийг Их Британийн хангамжийн сүлжээнээс бараа, бүтээгдэхүүн худалдан авах зарчмаар олгох боломжтой. UKEF-ийн дэмжлэг авахын тулд тухайн төслийн өртгийн 20%-ийг Их Британийн бараа бүтээгдэхүүн, үйлчилгээ, эсвэл биет бус хөрөнгө эзэлсэн байх шаардлагатай.
UKEF нь олон улсын болон хувийн хэвшлийн худалдан авагчдад зориулан нийт төслийн өртгийн 85%-ийг арилжааны санхүүжилтээр 100% баталгаажуулах боломжтой. Зээлийн баталгааг Их Британийн болон гадаадын агуулгатай, мөн орон нутгийн агуулгатай бараа, үйлчилгээнд ашиглаж болно. Төслийг дуусгасны дараа хамгийн ихдээ 15 жилийн хугацаанд зээлийг эргэн төлөх нөхцөлтэйгөөр зээл олгох боломжийг “OECD-ийн зохицуулалт” буюу Олон улсын албан ёсны дэмжлэгтэй экспортын зээлийн журамд нийцүүлэн санал болгоно.
Таныг дээр дурдсан асуудлууд болон бусад зүйлсийн талаар дэлгэрэнгүй ярилцах хүсэлтэй байгаа бөгөөд энэхүү чухал төслийг амжилттай хэрэгжүүлэхийн тулд цаашид хамтран ажиллахыг тэсэн ядан хүлээж байна.
Хүндэтгэсэн,
Эмма Томас
Африк, Америк, Зүүн Европ, Төв Азийн Бизнес Эхлүүлэлтийн Хамтарсан Захирал
UK Export Finance
Тэгэхээр Хотын дарга худал мэдээлэл тараав уу? Жагсаал цуглаанаар өөрийг нь огцруулах асуудал яригдахаар ажил хийсэн хүн болж харагдах гэв үү? эсвэл өөр зүйл байв уу? зэрэг олон хувилбар төрж байгаа бөгөөд дүгнэлтийг уншигч танд үлдээж байна.
