XVII жарны хөхөгчин могой жилийн сар шинийн баярыг тохиолдуулан болж байгаа “Өв тээсэн үнэ цэн-Сар шинийн үнэт бэлэг-” үзэсгэлэн Монголын Үндэсний музейд нээлээ.
Соёл, спорт аялал жуулчлал, залуучуудын яамны дэмжлэгээр Монголын Үндэсний музей, Дуут урлал ХХК, Монголын шатрын холбоо хамтран зохион байгуулж буй үзэсгэлэнд “Дуут урлан” ХХК-ийн 33 жилийн хугацаанд ур, ухаанаа шингээн монгол орны алт, мөнгө, зэс, цайрын агууламжтай металлаар бүтээсэн “Чингис хаан”, “Нүүдэлчин монгол”, “МЭӨ шатар”, “Хүннүгийн Атилла ба Ромын эзэнт улс”, “Мандухай сэцэн хатан ба Цодгор хүү”, “Монгол наадам”, “Болдоггүй бор өвгөн”, “Уран бэрийн нүүдэл” зэрэг 36 шатрыг толилуулж байгаа.
Уг үзэсгэлэнгээс олны анхаарлыг хамгийн их татаж буй шатар нь “Болдоггүй бор өвгөн шатар” үлгэр домгоос сэдэвлэсэн шатар юм.
Учир нь шатрын цагаан нь Болдоггүй бор өвгөн, шар нь хурмаст хааныг дүрсэлжээ. Цагааны хүү нь Болдоггүй бор өвгөний долоон хонь хундан цагаан хурга бол шар талын хүү нь хурмаст хааны хоёр бич, хоёр хэрээ, хоёр чоно, хоёр луу дүрслэгдсэн байгаа. Хурмастын хааны тэмээ нь л гэхэд эврээ алдахаас өмнөх байдалтай, морь нь л гэхэд бодь гөрөөс байгаа нь олны анхаарлыг эрхгүй татна.
Уг гайхалтай бүтээлийг урлаач нь ийнхүү тайлбарласан.
Мөн цагаан сарын уламжлалт эд эдлэл сав суулга, идээ ууцны цар, мөнгөн завъяа, даш бумба, дөрвөн хүчтэн урласан мөнгөн халбага сэрээ, эх төлийн загвартай цацлын халбага, эхнэр хүний иж бүрэн толгойн чимэг зэрэг монгол дархны ур ухаан шингэсэн чамин бүтээлүүдийг дэлгэжээ.
Монгол ур оюун ухаанаар бүтсэн хосгүй өв тээсэн үнэ цэнтэй сар шинийн үнэт бэлэгт залрах шатар, эмээ, ээж, охин дүүдээ өгөх хамгийн нандин бэлгийн нэг болох цацлын халбага энэхүү үзэсгэлэнгийн хамгийн борлуулалттай бүтээл бөгөөд бүтээлийг үзэж, мэлмийгээ баясгахыг урьж байна.
Үзэсгэлэн 2025 оны гуравдугаар сарын 15-ны өдрийг хүртэл Монголын Үндэсний музейн үзэсгэлэнгийн танхимд дэлгэгдэх тул өргөн түмнээрээ таалан үзэхийг урьж байна.
