Хөгжмийн зохиолч Д.Цэцэрлэг “Эгшиглэнт Цэцэрлэг” тайлан тоглолтоо хийх гэж байгаа билээ. Түүний уран бүтээлийн цэнгүүнд зарим дуучид “ирэхгүй” гэсэн талаар охин, дуучин Г.Эрдэнэтунгалаг мэдээлж, шүүмжилсэн байна.
Тэрээр “2000-аад оны эхэн үед аавын минь найз цагдаагийн хошууч Цогзол гэж эрхэм багын анд нь гэнэт өвчний улмаас бурхан болж, аав ээж хоёр минь найзынхаа хойдохын буянд зориулж дуун суварга босгосон нь “Зүүдэнд уяатай аав” дуу. Өдгөө нийтийн дууны ханхүү болсон Жавхлан энэ үед Баясгалантайгаа уран бүтээлийн зам салж байсан мөн аав нь тэнгэрт дэвшсэн хүнд үе таарч, энэ дуугаа аав ээж 2 маань Жавхлангаар дуулуулж байв. Жавхлан маань ард түмний өрөвч нинжин сэтгэл, энэ дууны буянаар өнөөгийн алдарт, өдий зэрэгт хүртлээ хайрлагдсан гэхэд хэтрүүлсэн болохгүй.
Монгол киноны сайхан бүсгүйчүүдийн нэг жүжигчин Н.Батцэцэгт хань Машбат нь зориулж “Монгол Эгшиглэн” дууны шүлэг зохиож, ээж минь ая зохируулсаныг гавьяат Лосолын Болдбаатар маань дуулж амьдруулсан. Мөн тэрээр найз нөхөрлөлийн үнэ цэнийг мэдрүүлсэн аав ээж хоёрын минь нас харгалзалгүй найзалдаг болсон Омог хэмээх их айлын сүлд дуу болох “Үерхэлийн дууг” дуулсан билээ.
Өнөөдөр ээж минь өөрийнхөө зохисон дуунуудаар “Эгшиглэнт Цэцэрлэг” хэмээх тайлан тоглолтоо хийх гэж байна. Аавыг өөд болсноос хойш ханьдаа зориулж буй уран бүтээлийн өглөг, нэг талаар. Нөгөө талаар өөрийн ганц биедээ багтаж ядсан их авьяасаа асгах түүхт өдөр нь. Гэтэл С.Жавхлан, Л.Болдбаатар хоёр утсаа авахгүй байна, амжихгүй гэлээ хэмээн эвий ээж минь өмөлзөж сууна. Арай үнэрхэхгүй байлтай.
Хүний мөс чанар, ач санах сэтгэл гэдэг монгол хүний жудагт дээгүүр эрэмбэлэгдэх чанар аа. Ялангуяа Л.Болдбаатрыг ээж нь, ээжийг минь СУИС-ийн эчнээ хариуцсан захирал байхад хөтөлж авчран, хүүг минь хоолонд нь хүргэж өг хэмээж, ээж ч ээжийнх нь захиасыг ёс төрөөр нь болгосон гэж бодож явдаг. Аль ч ухаанаа бодсон миний манай хоёр ирээд дуулаад өгчих байх аа” гэжээ.
