Монгол улсын иргэн Эрдэнэбатын Тэмүүлэн, Цэрэнпунцагийн Санжаачойпэл нарыг 2025 оны 7 сарын 18-19-нд шилжих шөнө Сүхбаатар дүүргийн III хорооны нутаг дэвсгэрт үйл ажиллагаа явуулдаг “Канте” шөнийн цэнгээний газрын гадаа талбайд хохирогч Д.С-ын нүүрэн тус газарт нь гараараа цохих, хөлөөрөө өшиглөх зэргээр биед нь бүлэглэн халдаж эрүүл мэндэд нь хохирол учруулсан хэрэгт сэжигтнээр татаж 48 цаг саатуулсан билээ.
Тэдэнтэй хамт уг хэргийг үйлдсэн хоёр хүний нэг болох Баатарсайханы Амарсайхан “оргон зайлсан” бөгөөд нөгөөг нь эрэн сурвалжилсаар өнөөдөр олж тогтоосон байна.
Эрдэнэбатын Тэмүүлэн, Цэрэнпунцагийн Санжаачойпэл нарын цагдан хорионы 48 цаг өнөөдөр 22:00 цагийн орчимд дуусах гэж байгаатай холбоотойгоор Сүхбаатар дүүргийн прокурорын газраас цагдан хориог сунгах саналаа Дүүргийн Эрүү, Иргэний хэргийн хялбар ажиллагааны анхан шатны тойргийн шүүхэд хүргүүлжээ. Цагдан хориог сунгах эсэх шүүх хурал яг одоо Дүүргийн Эрүү, Иргэний хэргийн хялбар ажиллагааны анхан шатны тойргийн шүүхэд эхлэх гэж байгаа бөгөөд бид энэ талаар эргэж мэдээлэх болно.
