Эмэгтэй хүний амьдрал 40 нас, 50 насандаа ид байдгийн жишээг Латин Америк гаралтай 2 дива илтгэн харууллаа.
Өнгөрсөн үдэш АНУ-ын хамгийн их үзэгчтэй спорт болох мэргэжлийн хөлбөмбөгийн лигийн Супербоул тоглолтын их завсарлагаар дуучин Шакира (43 настай), Женнифер Лопез (50 настай) нар утгаар нь байлдан дагуулалт хийжээ. Майами хотын Hard Rock цэнгэлдэхэд болсон хөлбөмбөгийн тоглолтын оргил хэсэг нь Жей Ло, Шакира нарын тоглолт байсан гэж болно.
Дуучин Шакира урлагийн хэсгийг эхлүүлж, англи хэл дээрхи супер хит дуунууд болох “She Wolf”, “Empire”, “Whenever, Wherever” зэргээ дуулсан. Тэгвэл дуучин, жүжигчин, фотомодель, энтрепренер Жей Ло 2000-аад онд ид “алж байсан” хип хоп хит дуунуудаасаа сорчлон “Ain’t It Funny”, “Get Right” зэргийг хүргэсэн юм. Ардаас нь “Waiting For Tonight” дуугаа дуулж, цэнгэлдэхэд цугласан 60,000 үзэгчийг доргиож чаджээ. Мөн энэ үдэш J Balvin, Bad Bunny зэрэг одууд хамтран дуулж, урлагийн хэсгийг чимж өгсөн байна.
Ингээд Супербоулын их завсарлагын дундуурхи тоглолтоо дуусгахдаа Шакира, Женнифер Лопез нар хөлбөмбөгийн ДАШТ-ний сүлд дуу гэдгээрээ дэлхийд танигдсан “Waka Waka”-г хамтдаа дуулсан юм. Дашрамд хэлэхэд дуучин Шакира шинэ цомгийнхоо ажилд анхаарч, Женнифер Лопез энэ онд дэлгэцнээ тавигдах “Marry Me” кинонд Овен Вильсонтой хамтран тоглож байна.
