Танин мэдэхүй: Сунаж мөргөх тухай

Бурхан багшийн зурмал, цутгамал, санаандаа дүрслэн төсөөлсөн ямарваа дүр хийгээд өөрийн номын багш, Хуврагийн чуулганд алга хавсран залбирч сүсэглэн мөргөнө.
Мөргөлийн тарнийг нэг удаа уншаад мөргөваас энэ насандаа хутагтын мөрийг олох ба өвчин хорлолоор үл нэрвэгдэж, мөргөлийн тарнийг нэгэн удаа мөргөсөн мөргөл нь мянга болон үржиж одох тэргүүтэн тус эрдэм хязгааргүй хэмээн зарлигласан. Мөргөл үйлдэх нь омог тэргүүтэн муу сэтгэлийн ерөндөг болдог. Мөргөл үйлдэхдээ өөрийн бие эрүүл саруул хойд төрөлдөө царай зүс сайтай болох, эд хөрөнгө хүсэж мөргөх огт шаардлагагүй учир нь мөргөлөөр сэтгэлийн хирийг арилгах тул царай зүс нь биеийн эрүүл мэнд, эд эдлэл дашрамдаа бүтдэг байна.
Эхлээд хоёр гараа, дараа нь хоёр өвдгөө, эцэст нь тэргүүнээ газарт хүргэн таван гишүүнээрээ залбиран мөргөж болно. Эсвэл бүтэн биеэрээ газарт хэвтэн хоёр гараа хамтад нь толгой дээрээ барин сунаж мөргөж болно. Сунаж мөргөх үедээ Бурхан багшийн дүр таньд шингэн уусаж байна хэмээн төсөөлнө.Духаа газарт хүргэсэн дуруйдаа өндийн босох хэрэгтэй. Газраас түргэн босох нь төрөх, үхэхийн хүрднээс үтэр түргэн тонилж чөлөөлөгдөхийг бэлэгдэнэ. Судрын номонд заасны дагуу ямарваа үл хүндэтгэсэн байдал гаргалгүйгээр зөв зүйтэй мөргөх хэрэгтэй. Ингэхдээ хуруунуудаа нийлүүлэн гарын бүтэн алгаар газарт хүрнэ, тахиа, галууны сарвуу мэтээр сарвайлгаж болохгүй, мөн гараа атгаж болохгүй.
Орчин үеийн шинжлэх ухааны эрдэмтэд бурхан шашинтны мөргөл үйлдэх зан үйлийг анаагаах ухааны үүднээс нарийвчлан судалж үзээд мөргөл залбирал их хийдэг хүмүүс зүрх судас, үе мөчний өвчлөлт тусдаггүй болохыг нотолжээ. Нэг мөргөөд босоход мэдрэлийн олон эд эс нуруун тулгуур ясны үе мөчүүд хөдөлгөөнд ордог тул таван цул бөөр бэлхүүсний өвчин арилдаг бол мөргөл үйлдэх нь далд утга нь бурханы адис бодитой өөрт тусаж муу үйл нимгэрч амсах ёстой байсан үйлийн үрийн зовлонг огт амсахгүй болой хэмээжээ.