COVID-19 цар тахлын улмаас 3 сар гаруй хугацаанд цахимаар зохион байгуулагдаж ирсэн Орхон аймгийн Засаг даргын Даваа гараг бүрийн шуурхай зөвлөгөөн өнөөдөр хэлтэс, агентлаг, байгууллагуудын дарга нарыг биечлэн оролцуулж нээлттэйгээр хуралдлаа.
Хуралдааныг Орхон аймгийн Засаг даргын орлогч С.Батжаргал, А.Түвшинжаргал нар удирдан зохион байгуулав.
Тус хуралдааны үеэр яригдсан зарим асуудлуудыг товчлон хүргэе.
• Орон сууцны байр хоорондын авто замыг нөхөх ажил 3 дугаар сараас эхлэн хийгдэж байгаа бөгөөд одоогийн байдлаар 280 м.кв орчим талбайд нөхөөс хийгээд байгаа аж.
• Хотын захирагчийн алба, Газрын харилцаа, барилга, хот байгуулалтын газар, Хот байгуулалт, барилга захиалагчийн алба болон Цагдаагийн газар хамтран Хүүхэд хамгаалах төвийн барилга барих газрын байршлыг тогтоож, барилгын ажлыг эхлүүлэхээр болжээ.
• Жаргалант сумын нэгдсэн хогийн цэгийг дарж, нөхөн сэргээлт хийж буй “Баганадант” ХХК-ийн ажлын явцтай холбогдох мэргэжилтэн, байгаль хамгаалагч нар газар дээр нь очиж танилцаж мэргэжил арга зүйн заавар зөвлөгөө өгч ажилласан бөгөөд одоогийн байдлаар ажлын явц 90 хувьтай байна.
• Улсын Онцгой комиссоос өгсөн үүрэг чиглэлийн дагуу ОХУ-ын Алтанбулаг боомтоор орж ирж буй 100-120 хүнийг ажиглах тусгаарлах байранд хүлээн авахад бэлэн болжээ.
Шуурхай хуралдааны төгсгөлд аймгийн удирдлагуудын зүгээс дараах үүрэг чиглэлийг өглөө.
Тухайлбал, байгууллагын удирдлагууд ээлжийн амралттай байх хугацаандаа орлон гүйцэтгэх албан тушаалтныг томилж, ажлаа бүрэн хариуцуулж ажиллуулах, 2020 оны улсын болон орон нутгийн төсвөөр хийгдэж буй бүтээн байгуулалтын ажлыг эрчимжүүлэх, баяр наадмын дараагаас эхлэн 2020-2021 оны өвөлжилтийн бэлтгэл ажилд анхаарч ажиллах, босоо удирдлагатай байгууллагын удирдлагууд 2021 оны хөрөнгө оруулалтын төлөвлөгөөндөө анхаарч дээд шатны байгууллагуудтайгаа хамтран ажиллах, өргөн хэрэгцээний бараа үнийг тогтвортой байлгах тал дээр хяналт тавих зэргийг байгууллага, хэлтэс, агентлагуудын дарга нарт үүрэг болгов.
Мэдээллийн төв
