Хүүхдийн тэтгэмж өгөхгүй гурваас дээш сар болбол хоригдоно
Гэр бүл цуцлуулсан бол хүүхэд тус бүрт хүүхдийн тэтгэмж тогтоолгодог. Хүүхдийн тэтгэмжийг тогтоохдоо тухайн хүүхэд амьдралын чанарын ямар түвшинд амьдарч байсныг үл харгалзан хүүхдийн тэтгэлгийг түүний амьдарч байгаа бүс нутагт тогтоогдсон амьжиргааны доод түвшингийн хэмжээгээр жишиг болгон тогтоосон. Өөрөөр хэлбэл одоогийн хүчин төгөлдөр мөрдөгдөж буй Гэр бүлийн тухай хуулиар хүүхдийн тэтгэлэг төлөх хэмжээ, хугацааг зохицуулсан байдаг. Энэ хуулиар хүүхдийг 11-18 нас хүртэл тухайн бүс нутгийн амьжиргааны баталгаажих доод түвшний хэмжээгээр, харин 0-11 нас хүртэл үүний 50 хувиар хүүхдээ тэжээн тэтгэнэ. Хугацааны хувьд тэтгэлгийг сар, жил, улирлаар, эсвэл бүхий л хугацааны турш нэг удаа мөнгөн болон эд хөрөнгийн хэлбэрээр барагдуулна гэж заасан.
Харин өнөөдөр шүүхийн шийдвэр гарсан ч хүүхдийн тэтгэмж өгдөггүй хариуцлагагүй эцэг эх цөөнгүй байдаг. Тэдгээр үүрэг, хариуцлагаа ухамсарлаагүй этгээдүүдэд хүлээлгэх хуулийн хариуцлага Зөрчлийн тухай хуульд байдаг. Хэрвээ хүүхдийн тэтгэмж гурван сараас дээш хугацаагаар төлөөгүй бол 100 000 төгрөгөөр торгох, цагдан хорих хуулийн зохицуулалт байдаг ажээ. Тодруулбал,
Зөрчлийн тухай хуулийн 6.20 дугаар зүйл.Хүүхдийн эрхийг зөрчих
“6.20.6.Тэтгэлэг төлөгч шүүхийн шийдвэрээр сар бүр төлбөл зохих хүүхдийн тэтгэмжийг гурван сараас дээш хугацаанд төлөөгүй нь эрүүгийн хариуцлага хүлээлгэхээргүй бол хүнийг нэг зуун нэгжтэй тэнцэх хэмжээний төгрөгөөр торгох, эсхүл албадан сургалтад хамруулж долоогоос гуч хоногийн хугацаагаар баривчлах шийтгэл оногдуулна.” Гэж заасан байна.
Хэдийгээр 100 000 төгрөгөөр торгуулах юм уу, гуч хоног саатуулагдсан ч гэсэн тухайн этгээд ЗААВАЛ хүүхдийн тэтгэмжээ барагдуулах ёстой юм. Цагдан хорихоос өмнөх авах арга хэмжээ бол хүүхдийн тэтгэмж өгөгчийн нэр дээрх данс болон хөрөнгийг битүүмжилдэг. Улмаар “гонжирсоор” байвал дээрх хуульд заасан арга хэмжээг авдаг ажээ.
Үүнээс гадна хүүхдийн тэтгэмж өгөхгүй бол хилийн хориг тавих эрх зүйн зохицуулалт бий.
Шүүхийн шийдвэр гүйцэтгэх тухай хуулийн 59.1-д “Тэжээн тэтгэх үүргээ гурван сараас дээш хугацаагаар биелүүлээгүй төлбөр төлөгчийн гадаадад зорчих эрхийг түдгэлзүүлэх” гэсэн заалт
Хүүхдийн тэтгэмж өгөгчид асуудлыг заавал цагдан хорионд тулах хүртэл хүндрүүлдэг. Тиймээс үр хүүхдийнхээ төлөө үүрэг, хариуцлагаа ухамсарлан хүүхдийн тэтгэмжийг сар бүр төлж, шаардлагатай бол хүүхдийнхээ өмсөх хувцас, идэх хоол, сургалтын төлбөрөөс төлөлцөж байгаарай.
Т.Энхриймаа
