Монголын хошин урлагт шинэ өнгө төрх нэмсэн жүжигчин Ц.Алдармаа мэргэжлийн чадвар, давуу талаа дэлгэцийн бүтээлээр илүү тодруулж гаргах болсон. Тэгвэл тэрээр өөрийн туулсан амьдралаа кино болгож, киноныхоо ерөнхий продюсераар нь ажилласан байна.
Хошин урлагийн “Шинэ үе” хамтлагаас ажлын гараагаа эхэлсэн тэрээр өдгөө 35 настай, ганц бие ээж.
Ц.Алдармаа арван жилийн сурагч байхдаа загвар өмсөгч болохыг мөрөөддөг байсан бөгөөд топ модель Д.Пүрэвсүрэнгээс үлгэр жишээ авч, биеэ сайхан авч явахын хажуугаар кино урлагт хүч сорихыг хүсч, жүжигчний мэргэжил сонгосон гэдэг. Хэдийгээр түүнд хувийн амьдрал, урлагийн карьертай нь холбоотой саад бишгүй тохиолдож байсан ч энэ бүхнийг ардаа үлдээжээ.
Жүжигчин Ц.Алдармаа “Ядуугийн зовлон-2” киногоор дэлгэцийн урлагт эргэн ирсэн бол төд удалгүй “Маш нууц” киноны хоёрдугаар анги буюу “Байтаг богд”-д тоглож, хэр чадвартай жүжигчин бэ гэдгээ харуулсан. Энэ дүрээрээ тэр “Academy Awards 2018”-ын шилдэг эмэгтэй туслах дүрийн шагнал хүртсэн байдаг.
Найруулагч Ц.Хүсэлбаатарын бүтээл “Нинжин сэтгэл” кинонд эмэгтэйчүүдийн хорих ангид ял эдэлж байгаа Клава бүсгүйн дүрийг бүтээснээрээ тэр кино шүүмжлэгчдээс мөн л өндөр үнэлгээ авч чадсан. Шинэ дүрийнхээ талаар жүжигчин бүсгүй “Би жүжигчин болсноосоо хойш яг ийм дүр дээр анх удаа ажиллаж үзлээ. Багагүй золиос гаргаж, дүрээ амьдруулсан. Эмэгтэй хүний хувьд бүтээхэд хүнд дүр ч гэлээ маш их хичээж, амилуулахыг хүссэн” хэмээн ярьж байлаа.
Ямартаа ч, ирэх сард нээлтээ хийх “Эхиймаа” кинонд жүжигчин Ц.Алдармаагийн туулсан жаргал зовлон бүгд багтжээ.
