Түмэн олныхоо зол жаргалын төлөө тэмцлийн гал дунд хатуужиж нэр нь тодорсон эрэлхэг эмэгтэй олон байдгийг хүн төрөлхтний түүх мэднэ. Фашист зандалчдын дүүжлүүр доор тэргүүнээ гудайлгүй зогсож << Зөвлөлт эх орон мандтугай>> гэж эцсийн үгээ хэлж байхдаа Ленийн комсомолын гишүүн, зоригт эх оронч эмэгтэй Зоя Космодемьянская дөнгөж арван наймхан настай байжээ.
Ардын хувьсгалын ялалтыг хамгаалан хувьсгалын эсэргүүчүүдтэй тэмцэж явахдаа дайсанд баригдаад хадан хясааны ирмэг дээрээс << Эх орон мандутгай! >>, << Нам эвлэл мандтугай>> гэж эцсийн үгээ зоригтой хэлээд дайсны гарь амь үрэгдсэн эрэлхэг эмэгтэй Т.Бор арван есхөн настай байлаа. 1913 онд Дундговь аймгийн Өлзийт сумын ард Түвдэнгийн нэгэн охин төржээ. Аав нь түүнд Бор гэж нэр өгчээ. Төрөлхийн сэргэлэн тэр охин 1930 онд 17 настайдаа бичиг үсгийн түр сургуульд орж монгол бичгийг гайхалтай түргэн сураад,ХЗЭ-ийн 372 дугаар үүрт гишүүнээр элсч дараа жил нь Цогт сумын ХЗЭ-ийн үүрийн нарийн бичгийн даргаар сонгогджээ. Тэр үед хар шар феодалууд гадаадын дайсантай сүлбэлдэн ардын засаг төрийг унагах зорилгоор зүсэн зүйлийн оролдлого хийж байв. 1932 оны хавар орон нутгийн феодалууд говийн хэдэн сумын олон зуун өрх айлыг хил давуулан нүүлгэх үймээн дэгдээжээ. Төөрөлдөн будилсан эгэл олныг дүрвээн нүүлгэхгүй байх хариуцлагатай,бас бэрхшээлтэй үүргийг ХЗЭ-ийн үүргийн дарга Т.Бор тэргүүтэй хэсэг хүмүүс орон нутгийн намын байгууллагын удирдлагаар гүйцэтгэжээ. Харгис лам нар, эсэргүү бүлгийн дээрэмчид Борыг үзэн ядах болов. 1932 оны 3 сард эсэргүү этгээдийг хорт явууллагын учрыг нутгийн ард олонд дахин таниулахаар Т.Бор хэсэг нөхдийн хамт морджээ. Тэл ухуулга хийж явсаар 20 шахам зэвсэгт дайсанд хүч автагдан баригджээ.
Тэднийг ангийн дайснууд зүйл бүрээр тарчилгаан зовоосон боловч,
-Бид эвлэрлийн гишүүд, намынхаа үйл хэрэгт тусалж, түмэн олны зол жаргалыг хамгаална. Эх орноосоо дүрвээд та нар жаргал үзэхгүй! гэж тэд зориг шантралгүй хэлж байв.
Нинжин сэтгэлгүй дайсан тэдний ханцуйгаао нь мод шургуулан тэлж, дүүжлэн зовоогоод эцэст нь Тугийн цохио гэдэг газар туун аваачжээ. Харгис дайснууд хамгийн түрүүнд сумын дарга болон ХЗЭ-ийн нарийн бичгийн дарга Т.Бор нарыг хөнөөжээ.
Т.Борын гэгээн дүр ард түмнийхээ зүрх сэтгэлд мөнхжин үлдсэн юм.
БНМАУ-ын Ардын Их Хурлын Тэргүүлэгчдийг 1963 оны VIII сарын 26-ны зарлигаар Өмнөговь аймгийн Цогтцэций сумын төвд эрэлхэг эх оронч Т.Борын хөшөөг босгож мөн сумын дунд сургуулийг түүний нэрэмжит болголоо. Нам, эх орныхоо үйл хэргийн төлөө хатан зоригтой тэмцэж амь үрэгдсэн Т.Борд 1971 онд МХЗЭ-ийн 50 жилийн ойг тэмдэглэх үеэр БНМАУ-ын баатар цол нэхэн олгожээ.
Их шуурга сөрөх мэт урагш тэмүүлсэн залуу бүсгүйн дүр бүхий хөшөө говь нутгийн цэлмэг тэнгэр доор сүндэрлэж байна.
Хөшөөнд залуучууд амьд цэцэг өргөж, түүний дэргэд пионерүүд шугам жагсаал хийж, баатарчуудад улаан бүч зүүж өгч байна. Тэд гар өргөн ёслож Эх орон ард түмнийхээ төлөө мятрашгүй тэмцэгч Т.Бор шиг иргэд болохоо батлан илэрхийлдэг билээ.
