Ц.Анандбазар: Б.Сүндэръяаг танихгүй, уулзаж байгаагүй
Өнөөдөр Б.Сүндэръяа буюу Сүнээ өөрийнхөө цахим орчинд мэдэгдэл хийж олон нийтийг цочиролд оруулсан. Харин УИХ-ын гишүүн Ц.Анандбзар Б.Сүндэръяа буюу Сүнээг дарамталсан хэрэгт сэжиглэгдээд байгаа билээ. Үүнтэй холбоотойгоор Ц.Анандбазар гишүүн өөрийнхөө албан ёсны цахим хуудсаар дамжуулан мэдэгдэл гаргажээ. Түүний мэдэгдлийг бүрэн эхээр нь хүргэж байна.
МЭДЭГДЭЛ
“Иргэн Б.Сүндэръяа өнөөдөр буюу 2021.04.11-ний өдөр “Sunee’s Ballet”, “Butenbayar Sunderya” фэйсбүүк хуудсандаа ноцтой мэдэгдэл хийсэн байна. Мэдээлэлд нэгэн УИХ-ын гишүүн хүн түүний биед халдсан, улмаар урт хугацаанд дарамтад байлгасан тухай дурдагдсан байгаа юм. Түүнд ийм бусармаг явдал үнэхээр тохиолдсон бол харамсаж байна.
Мөн уг асуудлыг хуулийн байгууллага шалгаж буруутай этгээдэд зохих хариуцлагыг хүлээлгэх ёстой гэж үзэж байна. Ийм зүй бус үйлдлийг цаг тухайд нь таслан зогсоож байх ёстой.
Харамсалтай нь хэн гэдэг УИХ-ын гишүүн хүн түүнд дарамт үзүүлж байсныг нэрлээгүй учир нийгэмд УИХ-ын гишүүн Ц.Анандбазар намайг холбогдуулан нэрлэж, бичиж эхэлжээ.
Ард түмний өмнө хууль ёсыг сахин биелүүлнэ гэж тангараг өргөсөн УИХ-ын гишүүний хувьд Ц.Анандбазар миний бие “Сүнээ” гэх нэрээр нийгмийн цахим сүлжээнд танигдсан Б.Сүндэръяаг танихгүй, уулзаж байгаагүй, тухайн мэдээлэлд дурдагдсан шиг үйлдлийг огт хийгээгүй гэдгээ хариуцлагатайгаар мэдэгдье.
Б.Сүндэръяагийн нийгэмд тараасан мэдээлэл нь зөвхөн УИХ-ын гишүүн хэн нэгэн гэхээсээ илүү Монгол Улсын хууль тогтоох дээд байгууллага УИХ-ын нэр хүндтэй холбоотой асуудал яригдаж байгаа учраас уг асуудлын үнэн мөнийг хуулийн байгууллагуудаар нэн яаралтай шалгуулах нь зүйтэй гэсэн байр суурьтай байна.
Иймд хуулийн байгууллагад хандаж, шалгуулах арга хэмжээг авах болно.”
