On’n Off продакшны гүйцэтгэх захирал, Mongolia’s Next Top Model нэвтрүүлгийн шүүгч Т.Нансалмааг танихгүй хүн ховор. 1990-ээд онд их хотын “лүүнз” хүүхэн явсан тэрээр монголын шоу бизнес, загварын ертөнц, урлаг соёлт мөрөө тод үлдээсэн бүсгүй.
Хүмүүст өөрийн дуу хоолой, ажил хэргээрээ эчнээ танил болсон Т.Нансалмаагийн талаар тэр бүр сайн мэдэхгүй байж болох юм. Учир нь Google-д түүний ярилцлага маш цөөн. Пентатоник наадмыг хөтөлж, “Master of Cerenomy” гэх нэр хүндтэй үүргийг гүйцэтгэж байснаар нь монголын элитүүд, дундаас дээш насныхан илүү тод санадаг байх.
Тэрээр “Эмэгтэй хүний залуу нас 18-35 хүртэл маш богинохон” гэж хэлэх дуртай. Монголын анхны продакшн On’n Off, анхны фм 102,5, анхны хувийн чөлөөт телевиз 25 сувгийг үүсгэн байгуулсан С.Ононбат, Ч.Чадраабал, З.Алтай нартай тэрээр хамтран ажиллаж байсан гэдгийг нь харахад л түүний эргэн тойронд тэр бүр олон нийтийн нүдэнд ил гараад байдаггүй нэгэн үеийнхэн тэр аяараа зэрэгцэн оршиж байгааг нь мэдэрч болно.
Оюутан байхдаа Улаанбаатар сонинд ангийнхантайгаа хамт “Улаанбаатарын үдэш” тусгай дугаар нээж, Монголдоо л анхны загварын бүтэн дугаар гаргаж байж. Үүнээс ердөө есхөн жилийн өмнө буюу 1981 онд л Улаанбаатарт хувцас өмсөж олонд таниулдаг ажил бий болсон гэдэг.
