“Voice of Mongolia” шоуны ялагч Ц.Энгүүн зарим дуучдаас илүү Монголчуудын танил болсон авьяаслаг охин. Хөгжим мэт хоолойтой хэмээн дэлхийн үзэгчид хүртэл түүнийг үнэлсэн байдаг.
Энэ бүх амжилтын цаана охиныхоо хүсэл сонирхлыг хүндэтгэдэг, авьяас чадварыг нь таньж тэр чиглэлээр илүү хөгжүүлдэг ачлалт ээж, аавын оролцоо бий. Тэгвэл дуучин Ц.Энгүүн ээжийнхээ гэрэл зургийг дэлгэж “Ээжээсээ том харагддаг охиноо уучлаарай,Ээжүүдийн баярын мэнд хүргэе ээжээ” хэмээн бичжээ.
Түүний ээжийн Бунддулам гэдэг, сэтгүүлч мэргэжилтэй бүсгүй юм. Охиноо хаана ч явсан хамт явж, охиныхоо авьяас чадварыг хөгжүүлж мундаг хөгжимчин бас дуучин болгохын төлөө зүтгэж яваа Монголын сайхан ээжүүдийн нэгэн төлөөлөл эмэгтэй билээ.
“The voice of Mongolia” шоуны ялагч Ц.Энгүүн таван настайдаа Хөгжим бүжгийн коллежид элсэж, урлагийн гараагаа эхлүүлсэн түүхтэй. Тэрбээр 2018 онд 17настайдаа “The Voice of Mongolia” шоуны ялагч болж, үеийн залуусаа байлдан дагуулж байв. Эрч хүчтэй, дайчин, цоглог Ц.Энгүүн анхны уран бүтээлээ “Халуун зүрх” киноны дуугаар эхлүүлсэн. Үүний дараа “Уучлалт гуйх гэж”, “Чи над шиг дурлаж чадах уу”, “Би өөрийнхөөрөө” зэрэг залуусын сонсох дуртай, орчин цагийн хэв маягийг илэрхийлсэн дуунуудыг “амилуулж” чадсан юм.
