Монголын урлагийн салбараас сайхан хосыг нэрлэ гэвэл, “Х-Түц” хамтлагийн жүжигчин Т.Бархүү МУГЖ И.Одончимэг нар яахын аргагүй орно. Хэдийгээр тэд 14 насны зөрүүтэй ч нийгэмд зөв үлгэрлэл үзүүлж, үе үеийнхэнд авъяас чадвараа гайхуулдаг.
МУГЖ И.Одончимэг Т.Бараатай анх танилцаж байсан үеэ дурсахдаа “Анх Найдандорж найруулагч Бархүүг дагуулж ирээд “би нэг сайхан хүү хамтлагтаа авлаа” гэж байсан юм. Тэр үед нь би байгаагүй. Хэд хоногийн дараа иртэл Бархүү сууж байна. Анхны сэтгэгдэл “юу нь сайхан юм бол доо” гэсэн шүү юм бодоод, Найдаа найруулагч авъяасаас гадна бие хаа, нуруу турууг нь харж дээ” гэж бодсон. Яваандаа уран бүтээлд оролцоод ирэхээр “энэ залуу ямар ч л байсан манай хамтлагт хэрэгтэй” гэж бодов. Тэгсэн нэг хурал дээр мань хүн намайг “Та ер нь дандаа ийм юм ярьдаг. Та нарын үе өөр” гэж байгаад тас шүүмжлэв. Үеийнхэн маань ч намайг тэгж шүүмжилж байгаагүй, миний өмнөөс хэлье гэснээ түс тас хэлдэг байв. Би дотроо зууж, өө сэв хайсаар. Нөгөөх чинь барагтаа алдаа гаргахгүй ээ. Яавал нэг загнах шалтгаан гарах бол гэж бодоод хараад байхад, хувцсаа их цэвэрхэн өмсөнө, шоу цэнгээд оролцохгүй гэр лүүгээ гүйчихнэ, даалгасан ажлыг хариуцлагатай хийчихнэ. Сүүлдээ Бараагийн энэ зан чанаруудыг хүндэлж эхэлсэн” гэжээ.
Мөн тэрээр “Ерөөсөө ганц гэм нь бидний насны зөрүү. Бараатай танилцахаас өмнө би үргэлж ирээдүйгээр амьдарч ирсэн. Тэр өдөр би зүгээр л өнөөдрөөр амьдрахыг хүссэн. Ээж маань хүртэл “Одноо чи юу хийчихвээ, яачих ваа охин минь” гэж гайхахад, ээжийнхээ нүд рүү харж байгаад “Охин нь өнөөдрөөр амьдрахаар шийдлээ. Миний энэ амьдрал хэдэн жилийн настай ч байж магадгүй. Ээжээ, би тавхан жил, үгүй юмаа гэхэд гуравхан жил өнөөдрөөр амьдарсан ч яах уу” гэж шийдэмгий хэлж байсныгаа мартдаггүй. Эргэн тойрны найз нөхөд маань хүртэл намайг ятгаж “Дэндүү тэнэг юм хийлээ, нэг л өдөр орхиод явна” гэж байв. Би өнөөдрийн амьдралдаа гомдохгүй. Надад тийм их кайф, аз жаргал, үзээгүй тэр их дутууг дүүргэсэн юм чинь. Дараагийн үр дагаварыг даах сэтгэлийн тэнхээ надад байна.
