“UB комеди” клубийн үндсэн гишүүн, комедиан, сагсан бөмбөгийн 3×3 төрлийн талбайн тайлбарлагч У.Содхүүгийн хошин мэдрэмжийг давах хүн цөөн.
Тэрээр өөрийн цахим хуудаснаа өөртэйгөө төстэй залуутай авхуулсан зургаа нийтлээд “Ихэр байсан гэдгээ мэдээд баяртай байна өө” хэмээн бичжээ.
Түүний хувьд нахтан зургийн мастер зураач Д.Уртнасангын бага хүү. Дээрээ гурван эгчтэй өссөн комедиан У.Содхүү анх бетбокс хийж олонд танигдсан. Тэрээр энэ тухайгаа “Нэг хэсэг хүүхэд бүр beatbox хийх гэж оролддог байсан. Бөмбөр тоглодог, сонсгол сайтай байсан болохоор Rahzel, Kenny Muhammad гэсэн гадаад уран бүтээлчдийг дагаж, дуурайж хийсээр байгаад beatbox сурсан. Дараа нь beatbox Ray улсын аварга шалгаруулах анхны тэмцээн зохион байгуулахад нь орсон. Эхний шатаа амжилттай даваад хоёр дахь үеийн battle-д Атай Боргужин гээд уран бүтээлчтэй таарсан. Тэгсэн өрсөлдөгч маань хөөмийлсөн. Би тэгэхээр нь энэ ямар ардын урлагийн тэмцээн биш дээ гээд шоолох маягтай зогсож байтал beatbox, хөөмий хоёрыг хослуулсан үзүүлбэр үзүүлсэн. Би бүр ангайгаад тэгээд бууж өгсөн. Тэр тэмцээнд Атай Боргужин түрүүлж, улсын аварга, алтан микрофоны эзэн болсон.
Гэхдээ beatbox Ray алтан микрофоныг нь өнөөг хүртэл өгөөгүй. Миний хувьд одоо комеди шоуны яриан дундуураа эсвэл гэртээ хүүхдээ саатуулахдаа л beatbox хийдэг” гэжээ.
