Монгол Улсын Ерөнхийлөгч Халтмаагийн Баттулга өчигдөр зарлиг гаргаж, Монгол Улсын Хөдөлмөрийн баатар, Ардын болон Гавьяат цол, одон, медаль хүртээсэн билээ.
Ерөнхийлөгчийн зарлигийн дагуу төрийн одон, медаль гардуулах ёслол энэ сарын 29-нд буюу бямба гаригт үргэлжлэх аж.
Энэ өдөр шагнал хүртэгсдийн дунд Монгол Улсын Гавьяат тамирчин, жүдо бөхийн ОУХМ Хишигбатын Эрдэнэт-Од багтаж байгаа бөгөөд Ерөнхийлөгчийн зарлигаар түүнд Гавьяат дасгалжуулагч цол хүртээхээр болжээ.
ДАШТ-ий хүрэл медальт, Азийн наадмын алт, хүрэл, ААШТ-ий хошой алт, гурван мөнгө, нэг хүрэл медальт, Гавьяат тамирчин Х.Эрдэнэт-Од 2008 онд зодог тайлж, дасгалжуулагчийн албанд шилжсэн бөгөөд өнгөрсөн хугацаанд Үндэсний шигшээ багийн дасгалжуулагчаар ажиллаж, тамирчдаа тив, дэлхий, олимпын наадамд амжилттай бэлтгэн, оролцуулсан.
Түүнийг өнгөрсөн гуравдугаар сард Олон улсын жүдо бөхийн холбооны /IJF/ Удирдах зөвлөлд сонгосон юм.
Олон улсын жүдо бөхийн холбооны Удирдах зөвлөл нийт 17 гишүүнтэй бөгөөд гавьяат тамирчин Х.Эрдэнэт-Од нь дэлхийд жүдог хөгжүүлэх зөвлөлд Японы Олимпийн хорооны ерөнхийлөгч, Японы жүдо бөхийн холбооны тэргүүн Ясүхиро Ямашита болон Кодокан жүдогийн Их сургуулийн тэргүүн Харуки Уимуратай хамтран ажиллаж байгаа билээ.
