“Зэрлэг цэцэгсийн хүлэмж” киноны Яргуйн дүрээр тун ч богино хугацаанд олны танил болж чадсан ҮДБЭЧ-ын бүжигчин М.Бямбаа урлагийн тайзан дээр олон жил бүжиглэж байгаа нэгэн.
Чуулгын бүжигчин гэдгээр бус дэлгэцийн ганцхан дүрээрээ л “од” болоод амжсан тэрбээр ганц охинтой, өрх толгойлсон ээжүүдийн нэгэн адилаар багагүй хугацаанд амьдарсан. Бүжигчин, жүжигчин бүсгүй нилээдгүй нууцалж үерхсэн залуутайгаа жилийн өмнө нижгэр хурим хийсэн.
Мөн төд удалгүй охиныгоо дүүтэй болгосон юм.
Тэгвэл жүжигчин бүсгүй охинтойгоо хамт үндэсний дээлний брэндийн нүүр царай болжээ. Ээжээсээ дутахгүй гоо үзэсгэлэн шингэсэн охин нь энэ жил 15 настай, ахлах ангийн сурагч. Үеийнхэн дундаа сайн бүжиглэдэг гэдгээ гайхуулж, өнгөрсөн жил бүжгийн томоохон тэмцээн уралдаанаас шагнал авсан гэж байгаа.
Ташрамд дуулгахад, бүжигчин М.Бямбаа “Би багадаа Дэнжийн 1000-ын зах дээр ундаа зардаг байсан. Ундааны цехээс 50 төгрөгөөр аваад 80 төгрөгөөр зарна. Бүлээн болчихоор нь хажуу талынх нь жижигхэн горхинд хөргөөд “Ундаа аваарай, ундаа аваарай” гээд суудагсан. Зарим хүн өнгөрсөн амьдралаа ярихаас ичдэг. Харин би хэзээ ч ичихгүй. Хүний л амьдрал шүү дээ. Харин ч ээж, аав минь амьдралын ухаан, ажил хийх арга барилыг багаас минь сургаж дээ гэж баярладаг. Ингэж амьдарсан минь одоо надад хэрэг болж байна” гэжээ.
