“Ододтой бүжиглэе” шоуны шилдэг оролцогчдын нэг, “Улаанбаатар би чамд хайртай”, “Рекет”, “One night”, “ТҮЦ-ний охид” зэрэг дэлгэцийн олон бүтээлд дүрээ бүтээж, өхөөрдөм төрх, авьяас чадвараараа танигдсан залуу жүжигчин Т.Бадамжавыг үзэгчид Жерри нэрээр нь андахгүй.
Мөн Алдар+Жерри инээдмийн цувралд тоглосноор нь үзэгчид илүү сайн мэдэх болсон билээ. Ингээд хошин урлагийн “Эмоци” продакшинд харьяалагдаж яваа жүжигчин Т.Бадамжав өөрийнхөө “ихэр”-ийн зургийг олонд дэлгэжээ. Гэхдээ тэр эхээс төрөхдөө ихэр төрөөгүй эхийн хэвлийгээс ганц, хоёр жилийн зайтай төрж, дэрсхэн өссөн учраас жүжигчин бүсгүй “Ихэр минь” хэмээн өхөөрддөг аж.
Тэрээр дүүгийнхээ талаар “ Миний хамгийн сайн найз, үнэнч хамтрагч, хэзээ ч намайг орхихгүй зөвхөн миний хажууд байх бурханы бэлэг” хэмээн тодорхойлсон байна.
Жүжигчин Т.Бадамжавын хувьд Увс аймгийн Зүүнговь суманд төрсөн. Таван настайдаа аав, ээж, ахын хамт Улаанбаатар хотод ирж суурьшжээ. Тэрээр багаасаа л дуулах, бүжиглэх, жүжиглэх дуртай байснаас гадна их эршүүд хүүхэд байсан гэнэ. Багадаа сэтгүүлч, нэвтрүүлэгч болохыг хүсдэг байсан түүний хүсэл нэг л өдөр тайзнаа “амилсан” “Парисын дарь эхийн сүм”-ийг үзсэнээр өөрчлөгдсөн. Үүнээс хойш “би яагаад жүжигчин болж болохгүй гэж” гэсэн хүсэл мөрөөдөлдөө хөтлөгдөн СУИС-ын босгыг давж, 2015 онд жүжигчний мэргэжлээр сургуулиа амжилттай төгсөв.
Түүнийг жүжигчин болно гэхэд эцэг, эх нь эмэгтэй хүнд хэцүү мэргэжил хэмээн ихээхэн дургүйцэж байсан гэдэг.
