Онлайн орчинд өөрийн гэсэн “гэр бүл”-ийг бий болгож, үнэртэнд дурлагсдын группт “өвөө” нэрээр алдаршсан олон улсын өмгөөлөгч мэргэжилтэй Н.Орчлон эх орондоо удахгүй ирнэ. Тэрээр ирэх бүрдээ группын гишүүдээсээ азтан тодруулж, үнэртэн бэлэглэдэг.
Тэрээр өөрийн цахим хуудаснаа “Зун Монголд очоод гишүүддээ тараах хоёрдох хайрцаг уснуудаа авчлаа. Удахгүй уулзая” гэжээ.
Н.Орчлон харагдаж байгаагаасаа насаар залуу ч түүний группын гишүүд нь “Өвөө” гэж өхөөрддөг. Тэрээр “Биений үнэр тухайн хүнийг илэрхийлж байдаг. Идэж буй хүнснээс шалтгаалж хүн бүр өөр үнэртэй. “Хэн сайн хотдог идэх вэ” гэх тэмцээн байдаг. Тэмцээний дараа оролцогчдынх нь биеэс түргэн хоол үнэртдэг гээд бод доо. Нэг бодлын муухай ч юм шиг. Яагаад гэвэл бидний идсэн зүйл арьсаар ялгардаг. Тэгэхээр тухайн хүний биеийн үнэр амьдралын хэв маяг, амьдарч байгаа орчин хэрэглэж байгаа гоо сайхны бүтээгдэхүүнээс шууд шалтгаална. Хүн бүхэн үнэртэн хэрэглэх шаардлагатай. Муухай үнэрээ дарах гэдэг утгаараа биш шүү. Яагаад гэвэл үнэр таныг таниулдаг байхгүй юу. Надаас сайхан үнэр үнэртэж байвал бусдад таатай сэтгэгдлийг үлдээх болно. Анхны сэтгэгдэл танилцсан хэдхэн секундэд төрдөг” гэжээ.
