ЭРҮҮЛ МЭНДИЙН ЯАМНЫ ХЭВЛЭЛИЙН ТӨЛӨӨЛӨГЧ Б.УУГАНБАЯР:
-“Спутник V” вакцины хоёр дахь тунг татан авах ажлыг хийж байна. Хоёр дахь тунд хамрагдах давтан тунгийн хугацаа 21-90 хоног учраас иргэдийг хүлээцтэй байхыг хүсье. Вакцинд хамрагдсан иргэд гурав хоног гам барихыг зайлшгүй анхаарна уу. Мөн бүрэн тунд хамрагдсан иргэд 14 хоногийн гам барьж халдвар хамгаалалтын дэглэмээ сайтар баримтлах хэрэгтэй. Дархлаажуулалтын ажил эрчимтэй үргэлжилж байгаа учраас иргэдийг дархлаажуулалтдаа заавал хамрагдахыг хүсч байна. Өнөөдрийн байдлаар 200 мянган орчим иргэд дархлаажуулалтад хамрагдаад байна.
Сүүлийн 24 цагт 10 мянга гаруй хүнд шинжилгээ хийхэд 1189 хүнээс халдвар илэрч, нийт батлагдсан тохиолдол 62585 болж нэмэгдлээ. Сүүлийн 24 цагийн хугацаанд 13 хүн нас баржээ. Шинээр батлагдсан тохиолдлуудаас Улаанбаатарт 989, орон нутагт 198, зөөвөрлөгдсөн нэг тохиолдол илэрсэн.
Нас барсан 13 хүний тухайд:
Улаанбаатар хотын голомтоос 76 эрэгтэй, 86, 77, 72, 82, 47, 57 настай эмэгтэй, 66 настай эрэгтэй, 91 настай эмэгтэй, 74 настай эрэгтэй 66 настай эмэгтэй тус тус батлагдаж эмнэлэгт хэвтэн амчлүүлж байхдаа нэн хүнд хэлбэрээр нас барлаа. Харин 64 настай эмэгтэй Булган аймгийн голомтоос, 64 настай эрэгтэй Төв аймгийн голомтоос батлагдаж, эмнэлэгт хэвтэн эмчлүүлж байгаад Covid-19-ийн нэн хүнд хэлбэрээр нас барсан байна. Ингэснээр Монгол Улсад Covid-19-өөр нас барсан тохиолдол 301 болж өслөө.
Нас баралт өндөр байгаа учраас вакцинжуулалтад бүрэн хамрагдахыг хүсч байна. Улсын хэмжээнд хэвтэн эмчлүүлж буй 5096 хүн байгаагаас 2755 хүний биеийн байдал хөнгөн, 1741 нь хүндэвтэр, 474 нь хүнд, 126 хүний биеийн байдал маш хүнд байна. Маш хүнд хэлбэрээр өвчилсөн хүмүүсийн тоо өдөр ирэх тусам өсч байна. Иймд иргэд вакцины бүрэн тундаа хамрагдаж халдвар хамгаалалтын дэглэмээ баримтлахыг хүсье.
Өчигдөр нийт 17376 хүн вакцинжуулалтад хамрагджээ. Улаанбатар хотод 954.046 хүн нэгдүгээр тун хийлгэсэн байгаа бол хоёрдугаар тунд 777.248 хүн хамрагдаад байна. Хөдөө орон нутагт 911.811, хоёрдугаар тунд 662.464 хүн хамрагдсан байна. Улсын хэмжээнд 1.865.857 хүн нэгдүгээр тунд, 1.439.712 хүн бүрэн тунд хамрагдсан байна.
