“Positive Mongolians” төслийг санаачлагч гэдгээр нь олон залуусын эчнээ таних Э.Дөлгөөн хоёр хүүхдийн ээж. Тэрээр анхны амьдралаа хүүгээ 20 настайдаа төрүүлсэн бөгөөд хүүгийнхээ аавтай удаан хамт амьдраагүй.
Швэд явахаасаа өмнө одоогийн нөхөр Д.Түвшинбаяртай танилцаж үерхэснээ нуудаггүй.
Э.Дөлгөөн эх орондоо ирсэн даруйдаа хүүгээ өөр дээрээ авч өсгөсөн гэнэ. Хүүхдүүдийнхээ талаар тэрээр “Манай хоёр хоорондоо 12 насны зөрүүтэй учраас тэс өөр дотоод ертөнцтэй. Том хүү хорвоог өөрийнхөөрөө танин мэдэх гээд хичээж буй өсвөр насан дээр яваа бол бага маань дөнгөн данган хэлд орж, хүн болчих гээд хичээж байх жишээний. Тийм ч болохоор хоёр хүүхдийнхээ тус бүрийн шаардлага хэрэгцээ, онцлогийг харгалзан үзэх нь тун чухал” гэжээ.
Мөн том хүүгээ өсгөж буй арга хэлбэр барилынхаа талаар “Сүүлийн зургаан, долоон жилийн хувьд манай том дийлэнх хугацааг аавтайгаа өнгөрүүлж ээжтэйгээ ирэн очин хамт байсан юм. Энэ нөхцөл байдлаас шалтгаалан саяхныг хүртэл аав ээжийнхээ салалтыг хүлээж авах нь хүүд их хүнд туссан байх. Одооноос л яагаад энэ хоёр хүн бие биедээ хайргүй болсон, яагаад гэр бүл салсан шалтгааныг ойлгож эхэлж байх шиг. Ээж, аавдаа эрхэлж нялхрах боломжгүй өссөн, дээрээс нь шилжилтийн нас нь эхэлж буй тул хүүгийн сэтгэлзүй тун эмзэг үе дээрээ яваа. Бага зэрэг асуудал тулгарах үед шуудхан толгойд нь “би энэ хоёрын хүүхэд биш болохоор надад ингэж хандаж байна, дүүг илүү их хайрлаж байна” гэх бодол орж ирдэг ч юм уу. Өсвөр насны өөрчлөлт бие махбод болон сэтгэлзүйд нь хүчтэй илэрч эхэлж байгаа болохоор алхам тутамдаа хайраа мэдрүүлж байх ёстой гэх алтан дүрмийг л хүүгийнхээ хүмүүжилд баримталж байна даа. “Өмнө нь чамайг хоёр хүн хайрладаг байсан бол одоо аавынх нь эхнэр, ээжийнх нь нөхөр гээд дөрвөн хүн чамайг бүтэн хайраар хайрлаж байгаа шүү” гэж хүүдээ би байнга захиж хэлдэг” гэжээ.
