Органик бүтээгдэхүүний “Lhamour” брэндийн үүсгэн байгуулагч, Ази-номхон далайн залуу шилдэг гарааны бизнес эрхлэгч шалгаруулалтын ялагч анхны монгол эмэгтэй Д.Хуланг танихгүй хүн ховор.
Бага насаа Герман улсад өнгөрүүлсэн тэрээр өөрийн хүсэл мөрөөдлөөр бүтээгдэхүүн хийж эхэлснээр бизнесийнхээ суурийг тавьсан гэдэг. Тэгвэл тэрээр компанийнхаа 7 жилийн ойг угтаж ажилчидтайгаа амралтад амарч байгаа гэнэ. Ингэхдээ бүх ажилчдынхаа цалинг ажлын өдрөөр тооцож амрааж байгаа аж. Энэ тухай өөрийн цахим хуудаснаа нийтлэжээ.
Бизнес эрхлэгч бүсгүй өөрийнхөө ажлынхаа онцлог арга барилын тухай “Бүтээлч сэтгэлгээтэй, баригдмал бус чөлөөтэй байх нь миний уг чанар юм шиг санагддаг. Нөгөө талаас би сайн төлөвлөдөг. Төлөвлөсөн зүйлээс төсөөлж харж чаддаг. Төлөвлөсөн бол биелүүлэх гэж зүтгэнэ. Ер нь нэг юм барьж авбал гүнзгий ороод явчихдаг. Тэгэхээр бүтээлч байдал, төлөвлөгөө гэсэн хоёр зүйлийг хослуулах дуртай юм болов уу. Үр бүтээмжтэй байх үе гэвэл, өдрийн турш уулзалт, менежментийн ажил гэж явсаар ажил тарснаас хойш шөнө хүртэл ганцаараа суухдаа төлөвлөх, бичих ажлаа амжуулдаг” хэмээн ярьж байсан.
