2018 оны Voice Mongolia шоуны оролцогч, дуучин жүжигчин С.Идэрмаа сүүлийн үед “Нүд” хэмээх дуугаараа илүү олонд танигдсан. Оюутан байхаасаа олны танил хүмүүсийн хараанд өртөж байсан тэрээр энэ сарын 5-нд төрсөн өдрөө нижгэр тэмдэглэжээ.
Олныг хамарсан тансаг оройн зоог, олны танил хүмүүсээр дүүрэн орчин үеийн хөгжимтэй парти зэрэг хөтөлбөртэй төрсөн өдөр зөвхөн түүнийх байсан гэнэ.
Дуучин бүсгүйн хувьд одоогоос гурван жилийн өмнө оюутны ширээнээс өндийсөн бөгөөд дунд сургуулиа хувийн сургууль дүүргэсэн гэдэг. Гуравдугаар курст байхдаа “Фантастик”-ийн Зүрхний хилэн киноны Сүглэгмаад тоглосон.
Мөн тэрээр “Ангарагаас ирсэн эмэгтэй” жүжгийн дууг дуучин Д.Отгонжаргалтай дуулсан нь олны анхаарлыг өөртөө татаж байв.
Дуучин жүжигчин бүсгүйн хувьд чөлөөт цагаараа хүний сэтгэлзүйг судалдаг, мөн пянз сонсох, уран зураг харах, ном унших дуртай гэнэ.
Энэ тухайгаа “Би пянзны жижигхэн цуглуулгатай. Надад пянз сонсоогүй өнгөрүүлсэн өдөр байдаггүй. Бас кофенд нугасгүй. Хүн дууг зөвхөн чихээрээ биш эд эсээрээ сонсдог байх. Би дуртай дуугаа сонсоод, ном уншиж суухдаа дотоод ертөнцөө эмчилж, бодлоо цэгцэлдэг. Эмчилгээ гэдэг зөвхөн зүү тариур, эмээр хэмжигддэггүй. Хүний бодол цэгцтэй, сэтгэл амгалан байхаас эрүүл мэнд эхэлдэг гэж боддог. Хүний сэтгэлзүй тайлагдашгүй нууцлаг. Дэлхий дээрх долоон тэрбум хүний цаана дахин давтагдашгүй өвөрмөц ертөнц байдаг нь сэтгэлзүй. Миний мэргэжлийн онцлогтой маань тохирдог учраас сонирхон, судалдаг” гэжээ.
