Нэгэн цагт Их наран улсын мэргэжлийн сумогийн дэвжээг эзэгнэж явсан энэ хоёр эрхэм хуурай ах дүүс.
Хэн хэн нь сумогийн дэвжээнээс сэтгэлзүйн шахалттай, өөрийн хүсэлтээр зодог тайлсан тэдний харилцаа хуучин хэвээрээ. Дөрвөн насны зөрүүтэй тэд нэг нэгнийхээ үгийг хамгийн сайн хүлээж авдаг учраас хуурай ах дүүс бололцсон биз.
Мэргэжлийн сумогийн 68 дах их аварга Д.Дагвадорж Харүмафүжийг ид барилдаж байх үед нь “Чи өрсөлдөгчөө ялъя гэж бодож байгаа бол түүнээс хоёр дахин илүү хөдөлмөрлө” хэмээн хэлж байсан гэдэг. Д.Бямбадорж нэгэнт хол ирснийх ээж, аавыгаа баярлуулна хэмээн ихэд хичээж, ахынхаа хэлснийг мөрдлөг болгосоор 2007 оны тавдугаар сард сэкивакэ цолонд хүртэж байв. Улмаар мэргэжлийн сумогийн 70 дахь Их аварга болсон тэрээр “Зовлого зовохоос зорилго мохохгүй” гэдэг үгийг хэлэх дуртай гэсэн. Хичнээн зодуулж, бие нь ядарсан ч зоригоороо ялагдахгүй гэж хичээдэг байсныг хамт суралцсан нөхөд нь ярьдаг.
Сүмогийн ертөнцөд түүний хамгийн дотны хүн бол багшаас гадна их аварга Д.Дагвадорж. Д.Дагвадорж аварга өөрийнхөө туршлага хүмүүжлээс дүүдээ дандаа сургана. Харин тойрч гардаггүй жамаар ах, дүү хоёр олон удаа учраа таарчээ. Харүмафүжи ахыгаа 2008 онд ялахдаа сэтгэл өндөр байв. Учир нь, аварга ахыгаа унагаасан ч энэ нь түүнээс сайн суралцсанаа харуулсан том бэлэг аж.
Түүнийг ёкозүна болоход их аварга Д.Дагвадорж “Lexus-570” машин бэлэглэж талархсан сэтгэлээ илэрхийлж байв.
