“Оном”-ын Д.Наранбаатар эх орондоо ирж явна
Муухан эмчээс дээр короновирусын мэдлэгтэй хүн бол “Оном” санг үүсгэн байгуулагч Д.Наранбаатар. Ковид-19 дэлгэрэх үеэс монголчуудад сошиалаар мэдээлэл хүргэж, уг халдварыг таслан зогсоох гарц гаргалгааг өөрийн цахим хуудсаараа дамжуулдаг тэрээр эх орондоо ирж байгаа аж.
Тэрээр энэ тухайгаа өөрийн твиттэр хуудаснаа “Нутгийн зүг хүлгийн жолоо залж байна. Улс орноо хүнд байдлаас гаргахын тулд чадах бүхнээ хийнээ. Монгол хүн бүр эрүүл байх болтугай, Хүж дэлхий амгалан байг” хэмээн бичжээ.
Түүний хувьд эмч биш физикч, нийгмийн энтрепренер хүн. Алтай хотод арван жилээ, МУИС-ийн физикийн сургуулийг төгссөн тэрээр физикээр АНУ-ын Пюрдугийн их сургуульд 2001 онд магистр, 2005 онд докторын зэрэг хамгаалжээ. Ингээд АНУ-ын Үндэсний эрүүл мэндийн хүрээлэнд дөрвөн жил судлаачаар ажиллаад 2010-2013 оны хооронд АНУ-ын физикийн тэргүүлэх лабораториудын нэг Аргоны үндэсний лабораторид профессороор ажилласан байна.
2013-2014 онд Станфордын их сургуульд удирдлагын ухааны магистрын зэрэг хамгаалж, хэдийгээр АНУ-д эрдэмтний хувиар амжилттай ажиллаж байсан ч эх орныхоо хөгжилд хувь нэмрээ оруулахаар 2014 онд Монголдоо буцан ирж, түүнээс хойш “Оном” сангийнхаа 50 гаруй хүнтэй багийг удирдан ажилладаг.
