Саид Молллайг гэр бүлийг Монголд авчрах боломжтой юу
Жүдогийн ДАШТ-ий алт, хүрэл медальт Саид Моллай Монгол Улсын иргэншил авч, Токио 2020 олимпын наадамд Монголын нэрийн өмнөөс барилдан мөнгөн медаль хүртсэн. Тэрээр хоёр жилийн турш Иран дахь гэр бүлтэйгээ уулзаагүй бөгөөд олимпын мөнгөн медалиа гэр бүлдээ мөн монголын ард түмэнд зориулж байгаагаа илэрхийлсэн. Юуны учир гэр бүлтэйгээ уулзаагүйг товчхон дурдвал, тэрбээр 2019 оны Дэлхийн аварга шалгаруулах тэмцээнд амжилтаа батлах, хошой аварга болохын төлөө хүч сорьсон. Гэтэл хагас шигшээд Бельгийн бөх Маттиас Кассед албаар я лагдаж, тавдугаар байр эзэлсэн юм. Учир нь хэрэв тэр ялбал нөгөө талаас Израилийн жүдоч Саги Муки гарч ирэх нь тодорхой байв. Тиймээс түүнтэй барилдахгүйн тулд тус улсын Тагнуулын байгууллага ар гэрт нь заналхийлж, улмаар албаар бууж өгсөн байдаг.
Үүний цаад шалтгаан нь Иранчууд Израилийг одоог хүртэл тусгаар тогтносон улс гэж үздэггүй, улс төрийн эртний үзэл сурталтай холбоотой аж. Улмаар Моллай тэмцээний дуусгаж, Иран буцалгүй Европ руу дүрвэсэн. Германд орогнож байхдаа Монгол Улсын иргэн болох хүсэлт гаргахад, Ерөнхийлөгч асан Х.Баттулга түүнийг 2019 оны арваннэгдүгээр сарын 20-нд “Монгол Улсын харьяат болгох тухай” зарлиг гаргаснаар, С.Моллай Монголын иргэн болсон байдаг.
Гэвч түүнд иргэншил олгосноор хоёр орны харилцаанд сэв сууж, Ираны талаас Монголын жүдо бөхийн холбоог олон улсын шүүхэд өгч байсныг олимпын зэрэгтэй шүүгч, Гавьяат дасгалжуулагч М.Бөхбат онцолжээ.
Сошиал хэрэглэгчдийн зүгээс Моллайн гэр бүлийг Монголд авчрах талаар ярьж эхэлсэн. Гэвч уг асуудал одоогоор тодорхойгүй байна.
