Анх 2004 дуучин Б.Дашдондогийн “Nature sound” дуулаачийн төвийн гурав дахь төгсөлтөд “Хонгор минь” дуугаа УДЭТ-ын тайзнаа дуулж, “Киви” хамтлаг байгуулагдсанаа зарлаж байсан билээ.
Ийнхүү ая зохиогч Б.Ангирмаагийн удирдлага дор хамтлагийн ахлагч Д.Уламбаяр, Ц.Намуун, Э.Энхзол нарын бүрэлдэхүүнтэйгээр уран бүтээлээ эхэлж байсан түүхтэй. Гарч ирсэн цагаасаа өвөрмөц дүр төрхтэй гишүүдийн бүрэлдэхүүн олны анхаарлыг татаж байсан юм. Хамтлагийн охидыг бүр цагаан, шар, хар арьстан хэмээн хэлээд заншчихсан. Тиймдээ ч өвөрмөц стильтэй, “өнгө, өнгийн” бүсгүйчүүд хэмээн хэлэгддэг.
Гэвч гуравдагч гишүүд нь байнга солигдсоор ирсэн. Гуравдагч гишүүнээр дуучин Энхзол, Халиун, Солонго, Агий нар байсан. Гэхдээ дуучин Ука яг энэ бүрэлдэхүүндээ илүү хайртай гэдгээ илэрхийлжээ.
Ука буюу Д.Уламбаяр
Продюсер Ангирмаа Уламбаяр хэмээх эвсэлтэй бүжиглэдэг дэгжин шар охиныг харснаар “Киви” хамтлагийг байгуулах санаа төрсөн гэдэг. Тэрээр 1979 онд төрсөн бөгөөд эцэг эхээс зургуулаа. Ука СУИС-д сурч, жүжигчин болохыг хүсдэг байсан ч ээж аавынхаа зөвлөгөөг дагаж гадаад хэлний “Орхон” дээд сургуулийн хэлмэрч, нарийн бичгийн даргын ангид орсон ч, сурсангүй. Тэгээд хэнд ч хэлэлгүйгээр СУИС-ийн жүжигчний ангид элсэлтийн шалгалт өгсөн боловч хоёр дахь шатны шалгалтандаа тэнцэлгүй уначихсан гэдэг. Түүнийг дуучин болохооосоо өмнө үсчин, гоо сайханч мэргэжилтэй байсан, бааранд тайчигч, бүжигчин, dj байсан гэх мэтээр ярьдаг. Ука 36 нас хүрч нэлээд нас, намба суусны хойно ээж болсон.
Ц.Намуунаа
Укагаас дутахааргүй хамтлагийн гол имижийг бүрдүүлэгч хольж, сольж боломгүй гишүүн бол Намуунаа. Түүнийг СГЗ Ухнаагийн ач охин гэдгийг хүмүүс мэддэг. Тэгсэн ч түүнийг Африк гаралтай хэмээн сенсааци тарж байсан ч ээж нь Монгол, аав нь Габон хүн байдаг гэсэн шуум дээр учиг тайлагдсан.
Тэрээр таван настайдаа “Бяцхан эстрадын дуучин” тэмцээний хүрэл медаль, Испанид болсон өсвөрийн төгөлдөр хуурчдын тэмцээний дэд байр, Парист болсон олон улсын хүүхдийн төгөлдөр хуурын тэмцээнээс Гранпри шагнал хүртэж байснаар багаасаа урлагийн хүн болох авъяас нь тодорсон гэдэг. Хамтлагт орж, дуучин болохоосоо өмнө загвар өмсдөг байжээ.
Б.Халиун
Анхны гуравдагч гишүүн Энхзол хамтлагаа орхисны дараа, Энхзолын оронд Б.Халиуныг хамтлагтаа шалган авсанаар “Киви”-гийн анхны цомог худалдаанд гарсан. Халиуныг “Киви” хамтлагт орж ирэхэд гайгүй сайхан дуулдаг хэмээх үнэлгээг авсан. Тэрээр Олон улс бизнесийн дээд сургуулийн Гаалийн татварын ангийг дүүргэжээ. Продюссер Ангирмаагийн хатуу удирдлаган дор байдаг охид хүүхэд төрүүлж, хүнтэй болзож болохгүй гэх мэт хатуу шаардлагуудын дор уран бүтээлээ туурвидаг байсан. Харин Б.Халиун энэ шаардлагыг нь зөрчсөнөөр хамтлагаасаа хөөгдсөн гэдэг. Харин өдгөө 3 хүүхдийн ээж болсон тэр эргэн хамтлагтаа иржээ.
