Өөрийгөө “Нийслэл хүү” хэмээн өхөөрддөг реппер Цэцээ тогооч болжээ. Тэрээр Chikira steakhouse ресторанд тогооч хийж өндөгний үзүүлбэр, будаатай аяганы үзүүлбэр зэргийг үзүүлсэн байна. Түүний хувьд тогооч, бизнесмэн, дизайнер, реппер, жүжигчин гэсэн урт гуншин дээрээ бүжигчин хэмээх алдрыг өнгөрсөн хавар “Ододтой бүжиглэе” шоуныхаа дараа нэмсэн.
Реппэр Цэцэ буюу Н.Цэцэнбилэг энэ жил 33 настай. Түүний аав нь цахилгааны инженер, ээж нь орос хэлний багш мэргэжилтэй. Айлын бага, дээрээ нэг эгчтэй. 220 мянгатад бусдын адил сагс тоглож, гражин дээр гүйж хүүхэд насаа өнгөрөөсөн. “Эхлэл” хувийн сургуулийг төгсөөд 2006 онд Америк улсыг зорьж, тэнд интерьер дизайны чиглэлээр сурч, ажиллаж амьдарч байгаад 2012 оны зун Монголдоо ирсэн. Хип хоп хөгжимд дуртай, Анх Уорон Жигийн цомгийг эгч нь төрсөн өдрийн бэлэг болгон өгсөн бөгөөд тэр цагаас хип хоп хөгжимд дурласан. Тэрбээр “хип хоп дуу сонсоод алхахад зорьсон газраа арай хурдан хүрдэг. Надад эрч хүч, хэмнэл мэдрүүлдэг учраас дуртай. Түүнээс гадна би пүүзний тухай, эсвэл төрийн өндөрлөг, эх орон, ээж аав гээд юуны ч тухай дуулж болно. Уран бүтээлээрээ өөр хэн нэгнийг шүүмжилж ч чадна, энэ бүгд нь таалагдсан” хэмээн хэлжээ. 2004 оноос Vanquish хамтлагийг байгуулж хааяа нэг дуулж ирсэн. Америкт очсоноос хойш хип хопыг илүү их сонсож дуулах болсон. Анх Америкт суралцаж байхдаа ханын шүүгээндээ студи байгуулж уран бүтээлээ эхэлсэн. Пульт, микрофон, өндөр нягтралтай камер худалдаж аваад хоолойгоо бичиж, дүрсээ аваад Монгол руу явуулж клип, дуугаа гаргадаг байв.
