“Ларьдма”, “Тютю”, “Төлөөс” зэрэг олон бүтээлээрээ үзэгчдийн сэтгэлийг баясгаж, дүр бүрээ амилуулж чаддаг чадварлаг жүжигчин О.Гэрэлсүх нэгэн цагт УДЭТ-ийн ганц Ромео явсан гэдэг.
Тэрээр өөрийн цахим хуудсаа өөртэйгөө усны дусал мэт ижил үрсээрээ гоёжээ. Түүний охин өөрийн мэргэжлээр сурахын сацуу, моделиор ажилладаг аж.
Хүүхэд байхаасаа л загварын том том уралдаан тэмцээнд оролцож, реклам зар сурталчилгаанд тоглоод мэргэжлийн түвшинд ажиллаж иржээ. Тэрээр уран бүтээл болон гэр бүлийнхээ талаар хэвлэлд ярихдаа “Том хүү маань 1997 онд төрж байлаа. Тухайн үед театрт Ромеогийн дүрд тоглодог байсан. Ромеогийн дүрд 1996-2003 оны хооронд буюу долоон жилийн турш тоглосон байдаг юм. Хүү маань гурван настай байхдаа ээжтэйгээ хамт “Ромео Жульетта” жүжгийг анх удаа үзэв ээ. Жаахан хүүхэд учир доод суудалд суугаад үзвэл уйлаад хүмүүст саад болох болов уу гээд дээд давхарт суулгасан юм.
Ингээд жүжгийн төгсгөлд, Ромео хайртай бүсгүйгээ хор уугаад үхсэнийг мэдээд, өөрөө араас нь хор уугаад үхэтхийн унадаг хэсэгт хүү маань ээжийнхээ өвөр дээр суугаад үзэж байхдаа “Аав аа” гээд тайз руу маш чанга хашхирсан. Тэгэхэд бүх үзэгчид дээшээ хараад “Эхнэр хүүхэд нь үзэж байгаа юм байна. Хүү нь юм байна” гэж ойлгоод инээлдээд явчихсан. Тэр их сайхан дурсамжуудын маань нэг л дээ. Хүү маань аавыгаа үхчихлээ л гэж бодоод их айсан байх” гэжээ.
