УИХ-ын гишүүн асан, Барилга, хот байгуулалтын анхны эмэгтэй сайд асан З.Баянсэлэнгэ ирэх 2024 оны сонгуульд өрсөлдөх, улс төрд эргэн ирэх бодолтой явдагаа нэгэн хэвлэлд ярьжээ.
Тэрээр албан тушаалын гэмт хэрэгт холбогдож, сүүлийн таван жил шалгуулсан. Харин шүүхээс түүний хэргийг бодит бус хохирол хэмээн буцаажээ. Тиймээс тэрээр хэвлэлд ярилцлага өгсөн байна.
Тэрээр “Шүүхийн хэрэг шалгагдаж дуустал сонгуульд өрсөлдөх, улстөржих хүсэл эрмэлзлэл байгаагүй. Хэргийг үнэн зөвөөр шалгуулж, нэрээ цэвэрлэх нь надад чухал байсан. 2020 онд сонгуулийн менежерээр ажилласан. Миний хувьд улс төрийн амаргүй замыг туулсан. 10 жил эмэгтэй хүнийхээ хувьд улс төрийн хүнд хатуу тэмцлүүдийг хийж явлаа. Хийгээгүй, үйлдээгүй хэрэгтээ 48 хоног хоригдож хүртэл үзлээ. Улс төрийн зам надад дардан сайхан байсангүй.
Нэг талдаа УИХ-ын гишүүн, сайд болж нэр хүндтэй төрийн албыг хашиж байсан боловч түүнээсээ илүү хэцүү замыг туулсан. Гэхдээ надад шантрах зүйл байсангүй. Нэгэнт улс төрийн амаргүй замыг сонгосон болохоор цаашдаа ч хоёр намын нэгдлийг бэхжүүлэх, гишүүдээ батжуулах, бүх талаараа нэгэн цул болоход хувь нэмрээ оруулж, өөрийн хүч бололцоогоо дайчилж ажиллана.
Улс төрийн замаас ухрах бодол байхгүй. Цаашдаа миний хийж хэрэгжүүлж чадах зүйлс байвал зүтгэнэ” гэжээ.
