УИХ-ын гишүүдийн тоог нэмэх Үндсэн хуулийн өөрчлөлтийг УИХ-ын чуулганы нэгдсэн хуралдаанаар хэлэлцэж байна. Анх хүн амын тоотойгоо уялдуулж, 152 гишүүнтэй болгоё гэсэн санал гаргасан ч иргэд дэмжээгүй. Иймд, гишүүний тоог 126 болгохыг УИХ дахь МАН-ын бүлэг өнөөдрийн хуралдаанаараа дэмжив.
Тэгвэл ямар үндэслэлээр УИХ-ын гишүүний тоог 126 болгох гээд байгаа үндэслэл нь юу вэ гэх асуултад Х.Нямбаатар, Д.Тогтохсүрэн нар ингэж хариулав.
Анх тавдугаар сарын 17-нд УИХ-ын НББХ-ны хуралдааны үеэр ХЗДХ-ийн сайд Х.Нямбаатар 126 гэдэг тоог намууд зөвшилцөж гаргасан тоо, Үндсэн хууль бол зөвшилцлийн баримт бичиг хэмээн тайлбарлаж байв. Тэгвэл өнөөдөр буюу тавдугаар сарын 30-ны өдөр УИХ дахь МАН-ын бүлгийн дарга Д.Тогтохсүрэн 126 гэдэг тоог үндэслэлгүй гаргаж ирээгүй, нэг гишүүн 27 мянган хүнийг төлөөлнө гэж тооцоолж 126 гэж гаргасан гэж тайлбарлалаа.
Х.Нямбаатарын яриа
“Гишүүдийн тоог куб язгуурын аргаар 152 гэж өргөн барих нь зөв гэж үзсэн. Харин 152 гэх тоог иргэд дэмжихгүй байгаа юм. Үндсэн хууль өөрөө зөвшилцлийн баримт бичиг. НҮБ-ын заавал хэрэгжүүлэх баримт бичиг дандаа л зөвшилцлийн хүрээнд гардаг. Тэр утгаараа УИХ-д суудалтай улс төрийн хүчин болох АН-аас 126 гишүүнтэй байя, сонгуулийн холимог тогтолцоо нь 60:40 харьцаатай байя гэдэг санал орж ирсэн. Үүнийг Ерөнхий сайд дэмжсэн бөгөөд Засгийн газраас барьж буй ганц хатуу зарчим бол одоогийн 76 буюу мажоритар тогтолцоогоор сонгож буйг ерөөсөө хөндөхгүй байя гэж байгаа юм. Өөрөөр хэлбэл, 76 гишүүн бол газар нутгийн төлөөлөл, 50 гишүүн нь бүлэг бүлгийн төлөөлөл. Бүлэг бүлгийн төлөөллийг оруулж ирэхийн тулд 50-аас доошгүй хүн жагсаах шаардлага байна гэж зөвшилцсөн” гэж хариулж байсан юм.
Д.Тогтохсүрэнгийн яриа
“126 гэдэг тоо бол зүгээр гаргаж ирсэн тоо биш. 1992 онд Үндсэн хууль батлахад манай улс 2 сая 50 мянган хүнтэй байсан. Тэр үед нэг гишүүн 27 мянган иргэнийг төлөөлж байлаа. Өнөөдөр бид 3.4 сая хүнтэй. Нэг тойрогт 27 мянган иргэн байна гээд үзэхээр 125.9 болж байгаа юм. Тэгэхээр 126 гэдэг тоо бол зүгээр гарч ирээгүй, хүн амын өсөлттэй холбоотой гарсан тоо юм” гэлээ.
Н.Саруулдөл
Эх сурвалж: itoim.mn
