Жил болгон борооны улмаас Улаанбаатарчууд усандаа автаж урссаар байх уу хотын дарга Д.Сумъяабазараа

Гурван өдөр үргэлжлэн орсон усархаг бороо Нийслэлчүүдийг шалгаж байна. Хаа сайгүй тогтсон их ус, усанд автаагүй газар гэж бараг алга. Машины хамар давсан их ус, эргээ хальсан Сэлбэ гол, бохир ус гээд асуудал тулгарч байна. Хамаг амьтан хараалаа урсгаж, жилийн жилд зун болгон Усанбаатар уртын харайлттай улирлыг үзсээр байх уу гэдэг асуултыг хотын удирдлагуудад тавьмаар байна. Нөгөөтэйгүүр гуравхан өдрийн усан бороо инженерийн бодлогогүй баригдсан чанаргүй орон сууцнуудыг харуулж байна. Өчигдрийн их усан борооны дараах нөхцөл байдлыг олон нийтэд харуулахаар сэтгүүлчид ажиллаж, зарим нь бүр завьтай мэдээ бэлтгэж харагдсан. Энэ бол нулимстай инээдэм байлаа. Ийм нөхцөл байдал жилийн жилд давтагддаг. Нийслэл хотод нэн тэргүүнд шаардлагатай нэгэн зүйл бол автозамын борооны ус зайлуулах шугам юм. Хэдийгээр бид жил болгон өдий төдий мөнгө хөрөнгөөр зам засдаг ч ус зайлуулах шугамаа шийддэггүй нь бараг уламжлал болжээ. Ус зайлуулах шугамаа шийдээгүйгээс болж хот бүхэлдээ усанд автаж хүн битгий хэл машин ч явахад хүндрэлтэй боллоо. Гурав хоногийн бороо өнөөдөр маргааш ч үргэлжлэн орно. Нийслэлчүүдийн замын чанар, стандарт, тэсвэр хатуужлийг шалгаж байна. Ус зайлуулах шугам хоолойгоо яагаад нэмэгдүүлж засдаггүй юм бэ хотын дарга Д.Сумъяабазараа. Жил болгон иргэд нь хараалаа урсгаж, хамаг эд хөрөнгөөрөө хохирч байх ёстой юмуу.
Шүхэр барьж, усны гутал өмссөн хүмүүс тогтоол усан дээгүүр гарах гэж мод чулуу дамжин “балетчин” шиг харайж байна. Энэ бол ойрын өдрүүдийн дүр зураг. Нийслэлийн төвд бол шавар шавхайд суучхалгүй тойрч аргалаад явах ч хажуугаар давхих машинуудаас хувцсаа “хамгаалах” гэж бөөн юм болно. Харин “гээгдсэн” гэр хороололд байдал ямар байгааг төсөөлөхөд ч хүнд. Борооны ус бус шавар шалбааг туулж, зарим нь гэрээсээ гарч чадахгүй боогдсон байдалтай байна.
Бороо орсон үед үүсдэг энэ асуудлыг Нийслэлийн үе үеийн удирдлагууд шийдэж чадаагүй явсаар өнөөдрийг хүрсэн. Жил бүр замын ажлыг хийж, авто замуудыг өргөтгөн засаж, шинээр зам тавьсаар байгаа ч хажууд нь ус зайлуулах хоолой барихаа таг мартаж орхидог нь иргэдийг багагүй бухимдуулж байна. Харин гэр хороололд ус зайлуулах шуудуу, хоолой барьж байгуулах ажил огт хийгддэггүй юм бишүү.
Гадны улс орнуудад заавал ус зайлуулах асуудлаа шийдэж байж тухайн замын ажлыг эхлүүлдэг. Украйн, Польш гэх зэрэг улсуудад энэ нь замынхаа хуулинд зохицуулагдсан байдаг. Тийм ч учраас өндөр хөгжилтэй орнуудад нэг км замд 1,5 км инженерийн шугам сүлжээг суулгасан байдаг ажээ.
Жил болгон ийм байдалтай байх уу. Ус зайлуулах шугам хоолойг шийдэх ёстой мөнгийг нь зусалчихаад байдаг юмуу. Хотын дарга нь “Ус зайлуулах системийг үе шаттай хийж байгаа. Нэмж хийнэ ч гэх шиг. Яасан хийж дуусдаггүй ажил бэ. Дөнгөж 17 хон байршилд ус зайлуулах систем хийсэн байна. Нэмж 8 байршилд хийнэ гэнэ үү. Улсынхаа ажилд хүн ардынхаа аюулгүй амар тайван байдалд ийм хойрго хандмааргүй байна аа, хотын даргаа. Үргэлжилсэн орсон борооны улмаас явах эд анги буюу машин тэргээ эвдэлсэн, усанд осолдож, эрүүл мэндээрээ хохирчихвол хэн хариуцлагыг нь үүрэх вэ, хэнээс хариуцлага нэхэх вэ.