БНСУ-ын Үндсэн хуулийн цэц Ерөнхийлөгч Юн Сок Ёолыг огцруулах шийдвэр өнөөдөр \2025.04.04\ гаргалаа. Тус улсын Үндсэн хуулийн цэцийн шийдвэр уншиж танилцуулсан даруй хэрэгжих юм. Ингэснээр Юн Сок Ёол БНСУ-н Ерөнхийлөгч байхаа больж жирийн иргэн болж байна.
Өнөөдрийн байдлаар ҮХЦ болон Ерөнхийлөгчийн Хөх ордон орчимд иргэд цуглаад байгаа юм. Ерөнхийлөгчийг огцруулах эсэхийг шийдвэрлэх ҮХЦ-ийн уг хуралтай холбоотойгоор Сөүл хотод хэсэгчлэн зам хааж, цагдаагийн хамгаалалтыг чангатгасан байна. Мөн тус бүс нутаг дахь сургуулиудын хичээлийг зогсоожээ. Мөн Өмнөд Солонгос улсын Үндсэн хуулийн цэцийн гишүүд болон тэдний гэр, гэр бүлийг хамгаалалтад аваад байгаа аж.
БНСУ-ын Ерөнхийлөгч огцорсон тул тус улсад 60 хонгийн дараа ерөнхийлөгчийн сонгуулийг зохион байгуулна.
Юн Сок Ёол нь БНСУ-ын 13 дахь ерөнхийлөгчөөр 2022 оны 05- сарын 10-ны өдрөөс өнөөдрийг хүртэл ажилласан. Бүрэн эрхийнхээ хугацааг дуусгаж чадаагүй тус улсын хоёр дахь ерөнхийлөгч болж байгаа юм.
Тэрбээр өнгөрсөн оны 12-р сард улсдаа онц байдал зарласан хэрэгт буруутгагдан ийнхүү огцорч байгаа. Нэгэнт жирийн иргэн болсон тул тэрбээр онц байдал зарласан үйлдэл нь гэм буруутай эсэхийг тогтоох гэмт хэрэгт шалгагдах болно. Түүнийг гэм буруутай эсэхийг тогтоовол бүх насаар нь хорих ял оноож болзошгүй байгаа.
Ингээд БНСУ-ын Ерөнхийлөгчийг огцруулах ҮХЦ-ийн хурал болон ард түмэн гадна нь хэрхэн цуглаан хийсэн талаарх зургуудаас хүргэж байна.
