Дуучин Ч.Алтантүлхүүр олон нийтийн сүлжээнд гурван хүүгийнхээ эцэг Сүхдамба-д хандан сэтгэл шимшрэм, шүүмжлэлтэй ил захидал нийтэллээ.
Тэрбээр хөвгүүдийнхээ ирээдүйг бодон олон жил тэвчиж ирснээ дурдаж, хүүхдүүд өсөхийн хэрээр анхаарал халамж, зардал нэмэгдэж, түүнээс ч илүү аавын орон зай чухал болдогийг онцолсон байна. Мөн салалтын дараах жилүүдэд ганцаараа бүхнийг нуруундаа үүрч, хүүхдүүдээ юугаар ч дутаахгүй өсгөхийн төлөө хичээсээр ирсэн ч сэтгэл зүйн ядаргаа хуримтлагдсаныг илэрхийлжээ.
“Уучлаарай… Гурван хүүгийн минь эцэг Сүхдамбаа.
Хөвгүүдийнхээ ирээдүйг бодож л олон жил тэслээ дээ… Одоо арай дэндэж байна аа. Би хөвгүүдээ юугаар ч дутаахгүй бүхнийг болгож, бүтээх гэж зүтгэж хичээсээр бие биш сэтгэл ядардаг юм байна.Гэсэн ч шартралгүй хичээсээр л байх болно.
Хүүхдүүд өсөхийн хэрээр анхаарал халамж, зардал ихсэж, түүнээс илүүгээр аавын орон зай чухал болдог юм байна…
Хүүхдүүдээ хар нялхад нь хувийн жаргалаа хөөгөөд хаяад явсан эцэг Сүхдамба чи над руу яаж ч аашилж, хамтдаа бүтээж байгуулсан бүхнээ аваад явахад чинь, эхнэр чинь хүүхдүүдийг минь гэрт нь очиход “Хүүхдийн агаарыг булааж амьсгалаад байна” гээд гэрээсээ хөөж байхад чинь, хүмүүс биднийг салахад намайг буруутгаж чамайг хохирогч гэж аашилж байхад ч би тэр бүгдэд дуугүй, тэрнээс цаадах бүхэнд ч хүлцэнгүй байсан.
Одоо болсон. Чи өөрийн мах цусны тасархай хүүхдүүддийг минь үл тоож эрхийг нь маш ихээр зөрчөөд удаж байгаа, түүнийгээ юман чинээ боддоггүй, хүүхдүүдээсээ зугтаад байгааг чинь үнэхээр өршөөж чадашгүй нь… Ааш зан, дүр төрхөөрөө чамайг дэндүү адилхан төрсөн хөвгүүдээ тоож, холбогдож, хааяа ч гэсэн аавын үүргээ биелүүлэхийг чамаас хүсье. Чи бид хоёр салсан байж болох ч чи өөрийн хүүхдүүдээсээ салаагүй шүү…
Танд Монгол хүний мөс чанар үлдсэн үү” гэв.
