Төрсөн дүүгийнхээ нөхөрт давуу байдал олгосон цэцэрлэгийн эрхлэгчийг торгов

Төр, нийтийн албан тушаал хашиж байхдаа хамаарал бүхий хүмүүстээ давуу байдал олгох явдлыг хууль сахиулах байгууллагынхан хяналтдаа авч, гэм буруутнуудад хариуцлага тооцуулсаар байна. Ийм нэгэн хэргийг Хан-Уул дүүргийн Эрүүгийн хэргийн анхан шатны шүүх хялбаршуулсан журмаар шийдвэрлэлээ. Тус дүүрэг дэх 73 дугаар цэцэрлэгийн эрхлэгчээр ажилладаг Д.Болормаа эрх мэдлээ урвуулж, хамаарал бүхий хүндээ давуу байдал олгосон хэргийг АТГ-ын Мөрдөн шалгах хэлтсийнхэн шалгажээ. Улмаар НПГ-аас түүнийг Эрүүгийн хуулийн 22.1-1 дэх хэсэгт заасан “Нийтийн албан тушаалтан албан үүрэг, бүрэн эрх, албан тушаалын байдлаа урвуулан ашиглаж, эсхүл зориуд хэрэгжүүлэхгүй байж өөртөө, бусдад давуу байдал бий болгосон” гэх үндэслэлээр яллагдагчаар татсан байна. Эх сурвалжуудын мэдээлснээр Хан-Уул дүүргийн 73 дугаар цэцэрлэгт бараа, материал болон үндсэн хөрөнгө худалдаж авахдаа эрхлэгч Д.Болормаа нь хамаарал бүхий хүн буюу төрсөн дүү Д.Б-гийн нөхрийн эзэмшлийн “Элит хангамж” ХХК-иас 14.3 сая гаруй төгрөгийн үнэ бүхий, 18 нэр, төрлийн 130 ширхэг эд зүйл худалдан авсан аж.
Мөрдөн шалгах ажиллагааны явцад дээрх цэцэрлэгийн эрхлэгч гэм буруугаа хүлээн зөвшөөрч, улсын төсөвт учруулсан хохирол, төлбөрөө төлөн, хэргээ хялбаршуулж шийдвэрлүүлэх хүсэлт НПГ-ын хяналтын прокурорт гаргасан байна. Улмаар прокурор хэргийг хянаж үзээд шүүхээр шийдвэрлүүлэх боломжтой гэж дүгнэн шилжүүлснээр дээрх шүүх хэлэлцээд Д.Болормааг 5.4 сая төгрөгөөр торгож, нийтийн албанд тодорхой хугацаагаар ажиллах эрхийг нь хасаж шийдвэрлэжээ.