Тодко Самсон төрсөн өдрөөрөө 10 мянган төгрөгийн тасалбартай “хайр” түгээнэ

Тодко Самсон төрсөн өдрөөрөө 10 мянган төгрөгийн тасалбартай “хайр” түгээнэ.Тэрээр “За маргааш төрсөн өдөр. Тэнэглэлээс өвчтөн рүү, өвчтөнөөс цагаач дүрвэгч рүү, цагаачаас зохиолч руу, зохиолчоос лектор руу, лектороос кино зохиолч продюсер гэх мэт дамнан өнгөрөөсөн он жилүүддээ анх удаа төрсөн өдөр тэмдэглэх гэж байгаа минь энэ. Гэхдээ утга учиртай баярламаар байна гэж шийдсэн. Энэ бол маргаашийн төрсөн өдөрт зориулсан дэлгүүрийн үнээрээ нийт 11800000₮ өртөг бүхий миний 6-төрлийн 436 ширхэг ном. Дөнгөж сая Ид Шидийн орноос хүрч ирээд ачаад явлаа. Эдгээр номыг та маргааш миний төрсөн өдөрт ирээд “СЭТГЭЛИЙНХЭЭ ҮНЭ”-ээр авч болно.
Таны тэр сэтгэл надад биш хүүхдэд зориулагдана. Дундговьд байгаа хүчирхийлэлд өртсөн, өртөж магадгүй эрсдэлт бүлгийн, “Тавиул хүүхэд” хэмээгдсэн хэдэн зуун ар гэрээсээ хол хамгаалах нөхцөлөөр тун эрсдэлтэй тэр хүүхдүүдэд зориулагдана.. Өнөө шөнийн 00:00 цагаас эхлээд бид Ид шидийн орон, “Лантуун дохио” ТББ-ын 00₮-үлдэгдэлтэй дансыг нээлттэй зарлана. Тэгээд бүгдээрээ ид шид бүтээе. Агуулга бүтээе. Бодит хайр түгээе. Маргааш миний төрсөн өдөрт бүх хүн ирж болно. Та ч ирээрэй.
Энэ бол урилга бас уриалга. Худалдаа аж үйлдвэрийн танхимын хойно Galaxy tower-ын нэг давхарт нь үйл ажиллагаа өглөө 11:00 цагаас эхэлнэ. Би таныг айраг боорцог, кофе жигнэмгээр дайлна. “Хайрлагдаж яваарай!” гэсэн ил захидал бэлгэлнэ. Дуу хуур шүлэг найраг, сонин содон яриа хөөрөө, гоё хүмүүсээр дүүрэн байлгахыг машид хичээнэ. Тэнд байх хамгийн гоё, ид шидтэй ах эгч нь та байгаарай. Жич: Надад гэж ямар ч бэлэг авах хэрэггүй! Ирж байгаа тань л бэлэг. #10Klove -д нэгдэж байгаа тань л миний төрсөн өдрийн бэлэг юм шүү! Хайрлагдаж яваарай” гэжээ.