“Салхи Дамбий”-гаараа алдаршсан жүжигчин Д.Бямбацогтод ГАВЬЯАТ цол өгөх болоогүй юу

Монгол Улсын төрийн соёрхолт, Д.Нацагдоржийн шагналт зохиолч Далхаагийн Норовын “Паанаг” өгүүллэгээс сэдэвлэн бүтээсэн “Ноён солиот” уран сайхны киноны Паанагийн дүрээр цэнхэр дэлгэцийн уран бүтээл сонирхогч, үзэгчдийн хайр хүндэтгэлийг хүлээсэн жүжигчин Д.Бямбацогтыг танихгүй хүн ховор.
Үзэгч олноо Салхи Дамбий хэмээн алдаршсан түүнийг бид “Молко” уран сайхны киноны нээлтийн үеэр онцлон дурандаа буулгалаа.
Түүний хувьд монголын урлагт 30 гаруй жил зүтгэж буй ч Монгол Улсын гавьяат жүжигчин цолыг хүртээгүй л яваа. Төрсөн нэрнээс нь илүү бүтээсэн дүрүүдийнхээ нэрээр дуудуулдаг жүжигчний нэг бол Бямбацогт мөнөөсөө мөн.
Салхи Дамбий, Ноён Солиот гадна “Зүрхэнд шингэсэн үг” киноны Мухар Базар, гэх мэтчлэн тайзан дээр ч дэлгэцэнд ч бүтээсэн гавьяатай нэгэн.
Жүжигчин Д.Бямбацогтын хувьд Завхан аймгийн Сонгино сумын харьяат аж. Тэрбээр Тосонцэнгэлд суманд зургаан нас хүртлээ бусдын адил амьдралаар амьдарч өссөн хэмээсэн юм. Түүний аав дөрөвдүгээр ангийн боловсролтой, цэрэгт таван жил явсан, шинэ үсгийн багш, багийн даргын алба хашиж байснаас гадна намын гишүүн, морь сайхан унадаг “Ганган” Дашням гэдэг хүн байжээ. Энэ нэрээр нь түүний аавыг хүмүүс анддаггүй байсан гэнэ лээ.