Баянзүрх дүүргийн 26 дугаар хорооны нутаг, “Олимп” хотхоны хойд талын замд өнгөрсөн аравдугаар сарын 10-нд Ч.Маралмаа гэх эмэгтэй “Ландкруйзер-200” загварын автомашин жолоодож, урсгал сөрөн долоон автомашин мөргөж, зам хөндлөн гарч байсан бага насны хоёр хүүхдийг дайрсан хэрэг гарч, олныг цочирдуулсан.
Жолоодох эрхийн үнэмлэхгүй ч согтуу нэгний автомашиныг жолоодон уг ослыг гаргасан түүнд холбогдох хэргийг ТЦА-ны Мөрдөн шалгах газарт шалгаж дуусаад Тээврийн прокурорын газарт шилжүүлжээ. Тус прокурорын газрынхан хавтаст хэрэгтэй танилцан мөрдөн шалгах ажиллагаа гүйцэд явуулсан гэж үзээд яллах дүгнэлт үйлдэн Баянзүрх дүүргийн Эрүүгийн хэргийн анхан шатны шүүхэд шилжүүлсэн байна. Ч.Маралмааг Монгол Улсын Замын хөдөлгөөний дүрмийн 3.7-гийн “Жолоодох эрхгүй үедээ тээврийн хэрэгсэл жолоодсон”, 12.3-ын “Жолооч хөдөлгөөнд аюул, саад тулгарахыг мэдсэн үед тээврийн хэрэгслийн хурдыг хасаж, зайлшгүй тохиолдолд зогсоох арга хэмжээ авна”, 11.5-ын “Эсрэг хөдөлгөөнтэй дөрөв буюу түүнээс олон эгнээгээр зорчдог замд эсрэг урсгал сөрөхийг хориглоно” гэх заалтыг зөрчиж, урсгал сөрөн долоон автомашин мөргөж, явган хүний замаар явж байсан 12 настай С, Э нарыг дайрч, эрүүл мэндэд нь хохирол учруулсан үндэслэлээр Эрүүгийн хуулийн 27.10-2.2, 2.4 дэх хэсэгт заасан “Авто тээврийн хэрэгслийн хөдөлгөөний аюулгүй байдал, ашиглалтын журам зөрчиж их хэмжээний хохирол учруулсан хэмээн яллах дүгнэлт үйлджээ.
Мөрдөн шалгах ажиллагааны явцад ШШҮХ-гийн шинжээчид хохирогч охидын биед хөнгөн гэмтэл учирсан хэмээн удаа дараа дүгнэлт гаргасан бөгөөд түүнийг нь эс зөвшөөрч шинжээч дахин томилуулснаар хүндэвтэр гэмтэл учирсан гэдгийг тогтоосон юм. Мөн автомашинуудын жолооч нарт олон сая төгрөгийн хохирол учирсан гэж дүгнэжээ.
