Дундговь аймгийн Сайхан-Овоо сумын иргэд нутгийн шүтээн уул болох Төгрөг хайрхан орчим олгосон тусгай зөвшөөрлийг цуцлуулахаар малчид нэгдэж, хандив цуглуулж эхэлжээ.
Төгрөг хайрхан уулын орчимд бүтээгдэхүүн хуваах гэрээ бүхий нүүрсний давхаргын метан хийн хайгуулын үйл ажиллагаа явуулахаар очсон “Петровис ресурс” ХХК багийн ИНХ-ын шийдвэргүйгээр хүчин төгөлдөр бус бичиг баримт бүрдүүлж уг зөвшөөрлийг авсан. Жилийн өмнө зөвшөөрлөө гаргуулсан тус компани өнгөрсөн 11 дүгээр сард хайгуул хийхээр очсноор нутгийн иргэдийн тэмцэлтэй тулгараад буй.
Харин одоо нутгийн иргэд сайн дураараа нэгдэн, хандивын аян өрнүүлж өмгөөлөгчийн төлбөрийг бүрдүүлэхээр ажиллаж байна. Төгрөг хайрхан орчмын хууль бус тусгай зөвшөөрлийг цуцлуулах хүсэлтийг өмгөөлөгч 10 сая төгрөгөөр гүйцэтгэхээ илэрхийлсэн юм байна. Тийм учраас малчин өрхүүд тус бүр нэг бог, 30-50 мянган төгрөг гэх мэтээр хандивлаж эхэллээ.
Төгрөг хайрхан уул нь далайн түвшнээс дээш 1320 м өндөрт Сайхан-Овоо сумын төвөөс зүүн хойш 30 км зайд оршдог. Уртаараа 0,5 км, өргөн нь 0,3 км, нийт 572,03 га талбайг эзлэн оршдог.
