Монголчууд цагаан сарын баярт өндөр ач холбогдол өгдөг бөгөөд бэлтгэлээ ч сарын өмнөөс базааж эхэлдэг. Учир нь баяр дөхөх тусам идээ шүүс бэлтгэх зардал өндөр болдог тухай иргэд хэлж буй. 
Энэ жилийн хувьд нэг өрх дунджаар 1,2-1,5 сая төгрөгөөр баярын бэлтгэлээ базааж байгаа гэх судалгаа байгаа боловч, баяр ойртсонтой холбоотойгоор бараа бүтээгдэхүүний үнэ тодорхой хэмжээгээр өсчээ.
Хэрэглээний зардлын хамгийн их хувийг идээ шүүс эзэлдэг.
Тухайлбал, хэдхэн хоногийн өмнө Хүчитшонхор зах дээр ууц, өвчүүний үнэ 180-350 төгрөгийн хооронд байсан бол өнгөрсөн амралтын өдөр ууцны үнэ 250-650 мянган төгрөг болж нэмэгджээ.
Энэ нь “Хүчит шонхор” захын задгай талбайд худалдаалж буй бөөний үнэ.
Энэ жил иргэд ихэвчлэн ууц авч байгаа бөгөөд үнийн хувьд жижиг нь 250-280 мянган төгрөг, дундынх нь 350 хүртэлх мянган төгрөгт таарч байгаа бол тарган хониных 450-650 мянган төгрөг байна. Харин өвчүү өөхтэй эсэхээс шалтгаалж килограмм нь 12-15 мянган төгрөг гэж байлаа. Залуу хүмүүс ихэвчлэн өвчүү авдаг байсан бол хоёр жил өргөн хүрээнд баяр хийгээгүй учир энэ жил жижигхэн ч хамаагүй ууц тавихыг чухалчилж байгаа гэдгийг худалдаачид хэлсэн юм.
Худалдагчдын хэлж байгаагаар иргэд цагаан сар болохоос сарын өмнө махаа бэлдэж эхэлдэг. Дорноговь, Хэнтий, Сүхбаатар, Өвөрхангай аймгаас гол төлөв мах ирж байгаа. Үнэ өнгөрсөн жилүүдийнхээс кг нь 1000-2500 төгрөг л өссөн гэв.
Хүчит шонхорт үхрийн ястай мах кг нь 9000-9500, хонины мах 7000-8000 төгрөгийн үнэтэй байна.
Харин ямааны мах 5500-6000 төгрөгийн үнэтэй байна.
