“Трио” уран сайхны кино Тайландын алдарт кино наадмын нэг болох “Thai Film Festival”-иас “Шилдэг кино” шагнал хүртсэн. Мөн АНУ-ын олон улсын кино наадмаас “Шилдэг зураглаач” номинацийн шагнал хүртсэн.
Олон улсын кино наадмуудад амжилт үзүүлээд буй “ТРИО” уран сайхны киноны нээлт өчигдөр боллоо.
Нээлтийн үеэр Гавьяат жүжигчин Т.Борхүү “Д.Баттөмөр надад ээжийн дүрд тоглох санал тавьсан юм. Ээжүүд олон янз байдаг. Харин энэ киноны ээж бол тусгай хэрэгцээт хүүхэдтэйгээ амьдардаг ээж. Би ийм хүүхэдтэй тулж байгаагүй. Өмнө нь Д.Баттөмөр бид хоёр Women кинонд хамт тоглосон юм. Д.Баттөмөр их авьяастай жүжигчин. Энэ кинонд дүр бүтээхэд их хэцүү байв, байсгээд л уйлж байв. 
Д.Баттөмөрийн ээж өнгөрөөд удаагүй байхад зураг авалт эхэлсэн тул Батаа маань дотроо ээжийгээ бодож тоглосон болов уу. Би 1940-өөд оны хүн учраас хөдөөгийн амьдралыг сайн мэднэ. Ээж хүү болж тоглох аз тохисон. Сэтгэл зүйн хувьд их хүнд байсан” гэв.
