Долоо хоног бүрийн лхагва гарагт Засгийн газрын ээлжит хуралдаан болдог. Энэ долоо хоногийн лхагва гараг олон улсын эмэгтэйчүүдийн эрхийг хамгаалах өдөр тохиож байгаа тул Засгийн газрын ээлжит хуралдааныг өнөөдөр /2023.03.07/ хуралдаж байна.
Хуралдаанаар Хөдөлмөр нийгмийн хамгааллын сайд Т.Аюурсайханыг чөлөөлөх асуудлыг хэлэлцэх юм байна. Тодруулбал, Хөдөлмөр нийгмийн хамгааллын сайд Т.Аюурсайхан өөрийн хүсэлтээр Засгийн газрын сайд, УИХ-ын гишүүний бүрэн эрхээсээ чөлөөлөгдөх хүсэлтээ өгсөн. Сайд өөрийн хүсэлтээр чөлөөлөгдөх хүсэлтээ өгвөл, Ерөнхий сайд түүнийг чөлөөлөх зохицуулалттай. Тиймээс түүнийг чөлөөлж, түүний сайдын ажлын тодорхой хугацаанд өөр сайд хавсран гүйцэтгэх юм. Т.Аюурсайханы хувьд нүүрсний хулгайн асуудалтай өөрийгөө холбоогүй гэж байгаа ч хуулийн байгууллагаас түүнийг яллагдагчаар татсан, ойрын хамаарал бүхий этгээдүүдийг нь шалгаж байгаа гэх.
Мөн Гадаад валютын улсын нөөцийг нэмэгдүүлэх чиглэлээр авах арга хэмжээний хэрэгжилтийн талаар, Төрийн өмчит компанийн төлөөлөн удирдах зөвлөлийн хараат бус гишүүнийг сонгон шалгаруулж, томилох үлгэрчилсэн журам, Эрт илрүүлэг үзлэг шинжилгээ, оношлогооны явц, түүний мөрөөр авч хэрэгжүүлж байгаа арга хэмжээний талаар зэрэг 17 орчим асуудал хэлэлцэхээр төлөвлөөд байна.
