Хөх, шар, цагаан өнгийн эдгээр хуванцар сав бараг айл бүрт бий. Зарим нь хортой гэдгийг нь мэдсээр байж хэрэглэдэг бол нөгөө нэг хэсэг нь хор хөнөөлийг нь мэддэггүйгээсээ хэрэглэсээр ирсэн.
Тэгвэл тус савыг хүнд үйлдвэрийнхэн хэрэглэдэг ажээ. Өөрөөр хэлбэл, будагч хорт бодисыг тус саванд савлаж оруулж ирдэг юм байна.
ШӨХТГ-аас гаргасан нэгэн судалгаагаагаар гэр хорооллын айл өрхүүд ундны ус, хүнсний шингэн бүтээгдэхүүн хадгалдаг хувсанцар савнууд нь эрүүл ахуй, чанарын шаардлага хангаж буй эсэх, энэ талаарх иргэдийн мэдлэг хэр байгааг тодорхойлсон байна.
Гэтэл хуванцар саванд тэмдэглэсэн тэмдэг, тэмдэглэгээг уншиж, таних хэрэглэгчийн боловсрол маш муу байгаа нь нотлогдсон байна.
Судалгаанд гэр хороололд амьдарч буй 500 иргэн болоод “Нарантуул”, “Тоса” худалдааны төв, Ус түгээх байр, “Хар хорин” захын худалдаачдыг хамруулсан байна.
Ингэхэд зах, худалдааны төвүүдэд худалдаж, ашиглаж буй хүнсний зориулалттай савнууд нь 5 номерын тэмдэглэгээ болон стандартын шаардлага хангаагүй байсан ба ийм тэмдэглэгээтэй сав хилээр орж ирдэггүй болох нь тогтоогджээ. Худалдаалагдаж буй хуванцар савнуудын зориулалт нь тос, химийн бүтээгдэхүүн хадгалах тэмдэглэгээтэй байсан ба мөн ямар нэгэн тэмдэг тэмдэглэгээгүй, хаана үйлдвэрлэсэн, зориулалт нь тодорхойгүй байсан аж.
Судалгаанд оролцогчдын дийлэнх нь хүнсний зориулалтын бус хуванцар савыг өргөн хэрэглэдэг, энэ нь хүний эрүүл мэндэд хортой гэдгийг мэддэг ч хэрэглээндээ байнга ашиглаж байгаа нь тодорхой харагджээ.
Мөн дийлэнх хэрэглэгч стандарт шаардлага хангасан хямд үнэтэй сав худалдаалвал худалдаж авах сонирхолтой байгаагаа илэрхийлсэн байна. Түүнчлэн судалгаанаас харахад хуванцар саванд тэмдэглэсэн тэмдэг, тэмдэглэгээг уншиж, таних талаар хэрэглэгчийн боловсрол маш муу байгаа нь нотлогдсон байна.
